Ўзбекистонда стартап лойиҳаларни қўллаб-қувватлашга қаратилган Startup Garage ташаббусига старт берилди

20 июль куни Ўзбекистонда биринчи Startup Garage лойиҳасининг очилиш маросими бўлиб ўтди.

Startup Garage — инновацион ва тадбиркорликни ривожлантиришга қаратилган ташаббус бўлиб, Ўзбекистонда стартап лойиҳаларни қўллаб-қувватлаш, сармоя жалб қилиш ва янги иш ўринларини яратишга йўналтирилган. Лойиҳа ёш ва истеъдодли тадбиркорларга зарур ресурслар, билимлар ва кўникмалар тақдим этиб, уларнинг лойиҳаларини муваффақиятли амалга ошириш имкониятини беради.

Startup Garage тадбиркорлик ва инновацияларни қўллаб-қувватлаш мақсадида ташкил этилган. Лойиҳа йирик банклар ва молиявий ташкилотлар томонидан қўллаб-қувватланади. Ташкилотчилар қаторида Рақамли технологиялар вазирлиги, АлоқаБанк, Aloqaventures, Moherdev.

Startup Garage’нинг асосий мақсади янги стартап лойиҳаларини қўллаб-қувватлаш, уларга сармоя жалб қилишда ёрдам бериш ва ҳар бирида камида 10 кишидан иш ўринларини яратишдир. Startup Garage йилига 20 дан ортиқ стартап лойиҳаларни қўллаб-қувватлашни мақсад қилган. Бу ташаббус орқали Ўзбекистоннинг технологик ва иқтисодий ривожланишига ҳисса қўшиш устувор мақсад қилиб қўйилган.

Startup Garage янги технологиялар, сунъий интеллект ва инновацион ғояларни ривожлантиришга катта эътибор қаратмоқда. Лойиҳанинг вазифаси ёш ва истеъдодли тадбиркорларни қўллаб-қувватлаш, уларга зарур ресурслар ва билимлар билан ёрдам беришдир. Startup Garage ҳозиргача 5 та лойиҳани ўз таркибига олган: Magicbot — SaaS B2B э-cоммерcе платформаси. Humocommers — тижорат ва чакана савдо тизимлаштириш платформаси. Pulse EV — электр транспорт воситалари учун зарядлаш станциялари ўрнатувчи ва ишлаб чиқарувчи компания. Ish.uz — иш қидириш ва кадрлар ёллаш платформаси. Vaamar ТМС — транспорт менежмент тизими.

Startup Garage’да қатнашишнинг афзалликлари қуйидагилардан иборат: лойиҳалар зарур ресурслар ва тажрибали мураббийлар билан таъминланади, стартаплар учун сармоя жалб қилиш имкониятлари яратилади, йирик молиявий институтлар ва бошқа тадбиркорлар билан алоқалар ўрнатиш имконияти мавжуд, бошқа стартаплар билан тажриба алмашиш ва ҳамкорлик қилиш имконияти тақдим этилади, шунингдек лойиҳаларга маркетинг ва реклама бўйича ёрдам кўрсатилади. Бу эса уларнинг бозорда ўз ўрнини топишига ёрдам беради.

Startup Garage’га кириш учун startupgarage.uz сайтида рўйхатдан ўтиш ёки +998770475753 рақамига қўнғироқ қилиш мумкин.

Шериклик ҳуқуқи асосида.