Дунёдаги энг йирик технологик анжуманлардан бири бўлган Web Summit конференцияси Қатарда бўлиб ўтди. Бу сафарги конференциянинг Қатарда ўтиши Яқин Шарқ учун катта ташаббус бўлди ва тақдим этилган лойиҳалар тўлиқ сотилди. Доҳада бир ҳафта давомида стартаплар, тижорат инкубаторлари ва технология ишқибозлари йиғилган тадбирда 15 000 дан ортиқ киши қатнашди, жумладан, Ўзбекистондан 50 нафар вакилдан иборат делегация иштирок этди. Делегация таркибида Ўзбекистон рақамли технологиялар вазири ўринбосари Рустам Каримжонов ҳам бор эди.
Саммитда “Дарё” мухбири билан суҳбатда у Ўзбекистон ва Қатар ўртасидаги алоқаларни чуқурлаштириш истиқболлари ҳамда улар иқтисодий ўсиш ва жамият тараққиёти учун рақамли технологиялардан биргаликда қандай фойдаланиши мумкинлиги ҳақида гапирди.
Қатар—Ўзбекистон муносабатларини мустаҳкамлаш
Вазир ўринбосари Ўзбекистон ва Қатар ўртасидаги муносабатлар гуллаб-яшнаётганини алоҳида таъкидлаб, буни ҳар икки давлат халқининг самимияти ва меҳмондўст табиати билан изоҳлади. “Ҳозирги кунларда алоқалар жуда яхши, – деди Каримжонов Қатардаги йирик компаниялар ва давлат идоралари билан ҳамкорлик қилиш қулайлигини таъкидлаб. Ўтган йили ҳар икки давлат раҳбарлари йил давомида бир неча бор учрашиб, икки давлат фуқаролари учун виза тартибини енгиллаштирди. Алоқалар яхшиланганидан яна бир далолат сифатида, Каримжонов мулоқот қилиш қулайлиги ва умумий маданий қадриятлар келгусидаги ҳамкорлик учун мустаҳкам замин яратганини ҳам таъкидлади. “Уларга Ўзбекистондан эканингизни айтсангиз, барчалар “дўст мамлакат” деб эътироф этишади”, — деди Каримжонов нутқида.
Web Summitъдаги стартаплар: Ўзбекистоннинг рақамли истеъдодлари намойиш этилди
Каримжонов Ўзбекистон саммитга 50 га яқин иштирокчи ва 10 та стартап олиб келганини фахр билан таъкидлади. Ушбу стартаплардан бири бўлган IMAN лойиҳаси PITCH финалига чиқди ва халқаро танловда кучли 3 таликдан бири сифатида эътироф этилди. Тадбирда иштирок этган бир қатор Ўзбекистон стартаплари ҳозирда Қатарда ҳам ўз ваколатхоналарини очиш жараёнида. У мамлакатнинг ёш, рақамли малакага эга аҳолисига аутсорсинг имкониятларини таклиф қилиш, уларни соҳага жалб қилишга қаратилган ҳукумат эътибори масаласига тўхталган ва унга юксак баҳо берган: “Шу тариқа улар бизнинг истеъдодларимиздан фойдаланадилар, бу биз учун ҳам, Қатар учун ҳам яхши, чунки уларда инсон ресурслари йўқ, бу конференцияда тақдим қилинаётган мақсадли лойиҳаларни амалга ошириш учун етарли инсон ресурслари уларда мавжуд эмас”.
Техника соҳасида аёллар ва қизларнинг имкониятларини кенгайтириш
Ўзбекистон Рақамли технологиялар вазирлиги
Технологиялар соҳасидаги гендер номутаносибликларига тўхталар экан, Каримжонов аёлларни АКТ соҳасига кўпроқ жалб қилиш ташаббуслари билан ўртоқлашди ва қизлар ўртасида кўпроқ муваффақият ҳикоялари зарурлигини таъкидлади. Каримжонов тан олиб эслаган энг катта тўсиқ шуки, қизларнинг оилалари фикри ҳали ўзгариши керак ва IT соҳасидаги меҳнатнинг қадр-қимматини инсонларга тушунтирилиши керак. “IT соҳасига қизларни жалб қилиш ҳам Ўзбекистоннинг устувор йўналишларидан биридир”, — деган Каримжонов.
Ўзбекистон вакили ,шунингдек, ижтимоий стереотиплар ва муаммоларни эътироф этиб, соҳа имкониятларини ҳам таъкидлади: “Агар сиз рақамли соҳада билим-кўникмага эга бўлсангиз, уйда қолиш ва болаларингизни тарбиялаш билан бир пайтда, пул ишлаш ва оилангизга ёрдам беришни ҳам амаллай оласиз”. Бу Ўзбекистон аёллари учун молиявий жиҳатдан мустақил бўлиш ва меҳнатни маданий талаблар билан мувозанатлаш учун яна бир йўл бўларди.
Инфратузилма муаммоларини енгиш
Ўзбекистоннинг IT-соҳасини ривожлантириш йўлидаги энг катта тўсиқлардан бири бу беқарор электр таъминотидир. Каримжонов шу каби инфратузилма масалаларига, хусусан, IT-соҳасининг пойтахтдан ташқарида ривожланишини қўллаб-қувватлаш учун барқарор электр энергияси ва интернетга уланиш зарурлигига ҳам тўхталиб ўтди. У бунинг аутсорсинг компаниялари учун аҳамиятини тушунтириб, “айниқса, аутсорсинг компаниялари учун барқарор энергия ресурслари жуда муҳим. Бу жуда муҳим”, деди. Унинг қўшимча қилишича, мамлакат электр тармоғини яхшилаш ва интернетдан фойдаланиш имкониятларини ошириш бўйича ишлар олиб бормоқда.
Келажакка назар
Вазир ўринбосари АКТ соҳасида халқаро ҳамкорлик ва IT-таълимга сармоя киритиш орқали ўсиш имкониятлари ҳақида оптимистик фикр билдирди. У Ўзбекистон ўзининг стратегик мавқейи ва рақамли истеъдодларидан фойдаланиб, глобал IT ландшафтининг асосий ўйинчисига айланишига умид билдирди.
Ўзбекистон ва Қатар ўртасидаги мулоқот ҳамкорликнинг янги йўлларини очиб беради, бу икки давлатга катта сармоя киритиш, билим алмашиш ва технологик тараққиётни таъминлайди. Ўзбекистонда “Қатар кунлари” тадбирини ўтказиш режалари ва келажакдаги ҳамкорлик бўйича давом этаётган мунозаралар билан иқтисодий ва ижтимоий тараққиёт учун рақамли инновациялар кучидан фойдаланадиган ҳамкорликни чуқурлаштириш учун замин ҳозирланмоқда.
Тони Крюгер тайёрлади
Дунё янгиликларидан хабардор бўлиш учун “Дарё”нинг Instagram ва Twitterдаги расмий саҳифаларини кузатиб боринг.
Изоҳ (0)