Россия президенти Владимир Путин 11 октябрь куни Туркманистонга амалий ташриф билан боради. Бу ҳақда унинг ёрдамчиси Юрий Ушаков маълум қилди.
11 октябрь куни президент Туркманистон раҳбарининг таклифига биноан амалий ташриф билан Ашхободда бўлади. Владимир Владимирович Путин туркман шоири ва мутафаккири Махтумқули Фироғий таваллудининг 300 йиллигига бағишланган “Даврлар ва цивилизациялар алоқаси — тинчлик ва тараққиёт асоси” халқаро форумида иштирок этади, дейди Ушаков.
Таъкидланишича, форумга Қозоғистон, Қирғизистон, Мўғулистон, Тожикистон ва Ўзбекистон етакчилари ҳам ташриф буюради.
Туркманистон ҳукумати мазкур тадбир “кенг қамровли ва ўзаро ҳурматга асосланган халқаро мулоқот ўрнатиш учун сиёсий ва маънавий платформа” бўлишини кутмоқда.
Юрий Ушаков форум доирасида пленар мажлис ва расмий тушлик ўтказилишини айтди. Шунингдек, Путин Ашхободда икки томонлама учрашувлар ўтказиши мумкин.
Путин Эроннинг янги президенти билан учрашади
Россия президенти Туркманистонга сафари давомида Эрон президенти Масъуд Пезешкиён билан учрашади. Москва учрашув бўйича “аллақачон келишиб олган”.
Бу учрашув икки томонлама масалаларни муҳокама қилиш учун ҳам, албатта, Яқин Шарқда кескин тус олган вазиятни муҳокама этиш учун ҳам катта аҳамиятга эга, деб таъкидлади Ушаков.
Шу билан бирга, у бошқа икки томонлама алоқаларни ҳам истисно қилмаган.
Изоҳ (0)