Олий Мажлис Сенати раиси Танзила Норбоева Женева шаҳрида ўтаётган Парламентлараро иттифоқнинг 149-ассамблеясида Парламентлараро иттифоқ (ПИ) бош котиби Мартин Чунгонг билан учрашди. Бу ҳақда Сенат ахборот хизмати хабар бермоқда.
Учрашувда 2025 йилда Ўзбекистонда бўлиб ўтадиган Парламентлараро иттифоқнинг 150-ассамблеясига тайёргарлик кўриш масалалари муҳокама қилинган.
Парламентлараро иттифоқ бош котиби Мартин Чунгонгга кўра, иттифоқнинг 150-юбилей ассамблеяси Тошкент шаҳрида ўтиши ўзаро ҳамкорликнинг асосий воқелигидир.
“Биз юбилей ассамблеяни тарихий тадбир қилиш истагидамиз. Шунинг учун кун тартибига киритиладиган масалаларни кўриб чиқиб, Ўзбекистон Марказий Осиё минтақасидаги парламентларни мобилизация қилишда Парламентлараро иттифоққа қандай ёрдам бера олишини муҳокама қилдик.
Бундан ташқари, учрашувда гендер тенглиги, ижтимоий ривожланиш, инсон ҳуқуқлари каби мавзуларга ҳам эътибор қаратдик. Чунки буларнинг барчаси барқарор ривожланиш мақсадларининг бир қисми ҳисобланиб, кун тартибидан ўрин олади”, деди Мартин Чунгонг.
Ассамблея иши доирасида Танзила Норбоева Парламентлараро иттифоқ Раиси Тулия Эксон билан ҳам учрашган. Унда Ўзбекистонда бўлиб ўтадиган Парламентлараро иттифоқнинг 150-ассамблеяси дастури, тадбирга доир режалар ва янги лойиҳалар ҳам муҳокама қилинган.
Изоҳ (0)