Европа тикланиш ва тараққиёт банки (ЕТТБ) Ўзбекистон иқтисодиёти 2024 ва 2025 йилларда 6 фоизга ўсишини прогноз қилмоқда. Бу ҳақда банк ҳисоботида маълум қилинди.
"Мақсадли ўсиш даражасига эришиш учун бозор ислоҳотларини давом эттириш ва инфратузилмага сармоя киритиш зарур бўлади. Бироқ, минерал ёқилғилар импортининг ошишига олиб келган энергия ресурсларининг мавжуд тақчиллиги мамлакатнинг иқтисодий салоҳиятини чеклаши мумкин", дейилади ҳисоботда.
Шунингдек, ЕТТБ ҳисоботида Европа, Кавказ, Марказий Осиё ва Шимолий Африкадаги ривожланаётган бозорлар иқтисодиёти 2024 йилда 2,8 фоизга, 2025 йилда эса 3,5 фоизга ўсиши прогноз қилинган. Аввалроқ, май ойида ўсиш прогнози 3% ва 3,6% ни ташкил қилган эди.
Прогнознинг пастлиги бир неча омиллар билан боғлиқ: ривожланган Европа давлатлари иқтисодиётининг заифлашиши, Қозоғистон ва Ўзбекистонда тоғ-кон саноатининг турғунлиги, Ғазо секторида давом этаётган можаро, Марокаш ва Тунисдаги жиддий қурғоқчилик ва ҳоказо.
"Ўзбекистон иқтисодиётининг ўсишига пул ўтказмалари ва сайёҳлар келишининг кўпайиши сабаб бўлмоқда. Минтақавий иқтисодий истиқболлар ҳисоботида мамлакатнинг хизмат кўрсатиш ва саноат ишлаб чиқариш тармоқлари мустаҳкамлангани қайд этилган. ЕТТБ бозорга йўналтирилган ислоҳотларни давом эттириш ва инфратузилма инвестициялари ҳисобидан Ўзбекистон иқтисодиёти 2024 ва 2025 йилларда ҳам 6,0 фоизга ўсишини кутмоқда. Бироқ, минерал ёқилғи импортининг ўсишига олиб келган энергия тақчиллиги қийинчилик туғдириши ва ўсиш имкониятларини чеклаши мумкин", дейилади ҳисоботда.
Изоҳ (0)