Сурхондарё вилоятининг Бандихон туманида фуқарога ер майдонини олиб беришни ваъда қилган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, фуқаро М.Т. фуқаро К.И.нинг ишончига кириб, унга тумандаги “Полвонтош” МФЙ ҳудудидаги давлат захирасида бўлган 1,5 гектар ер майдонини гўёки юқори лавозимда ишловчи танишлари ёрдамида 300 млн сўм эвазига унинг номига расмийлаштириб олиб беришини ваъда қилган.
Сўнг ушбу пуллар ҳисобидан 14,2 минг доллар ва 100 млн сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкентда 7 сотих ерни 175 минг долларга олиб беришни ваъда қилган шахс ушланган эди.
Шунингдек, Тошкент шаҳрининг Миробод, Андижон вилоятининг Асака, Навоий вилоятининг Қизилтепа ҳамда Хоразм вилоятининг Янгибозор туманларида ер майдонлари олиб беришни ваъда қилган шахслар ушланганди.
Изоҳ (0)