“Вест Ҳэм” футболчиси Лукас Пакета пул тикиш орқали даромад қилиш учун атайин сариқ карточкалар олгани учун футболдан бутун умрга четлатилиши мумкин, дея хабар бермоқда Daily Mail.
Манбага кўра, Пакета 2022 йилнинг ноябридан 2023 йил августига қадар “Лестер”, “Астон Вилла”, “Лидс” ва “Борнмут”га қарши ўйинларда атайин сариқ карточкалар олганликда айбланмоқда.
Футболчининг ўзи, шунингдек, унинг 60 нафарга яқин дўстлари, танишлари ва қариндошлари Бразилияда Пакетанинг сариқ карточка олиши учун 7 дан 400 фунтга қадар пул тикишган. Ютуқнининг умумий нархи 100 минг фунтни ташкил этади.
Тергов бошланганидан сўнг, футболчининг хабарлари, қўнғироқлари ва банк кўчирмаларини текшириш учун телефони олиб қўйилган. Шундан кейин телефон Лукасга қайтариб берилган. Бир муддат вақт ўтгач, терговчилар баъзи тафсилотларни аниқлаш учун яна телефонни сўрашганида, Пакета уни ташлаб юборганини айтган.
Шу сабабли у маълумотларни яшириш ва терговга тўсқинлик қилишда айбланмоқда.
Англия футбол ассоциацияси Пакетани майдонда қасддан нотўғри ҳаракатлар қилишда айблади ва ярим ҳимоячини умрбод футболдан дисквалификация қилинишини талаб қилмоқда. Пакетанинг ўзи эса бу айбловларни рад этмоқда.
27 ёшли Лукас 2022 йилдан буён “Вест Ҳэм” шарафини ҳимоя қилиб келмоқда. Ундан аввал эса футболчи “Фламенго”, “Милан” ҳамда “Лион” каби жамоалар шарафини ҳимоя қилган.
Изоҳ (0)