Ўзбекистонда хизмат кўрсатган артист Райҳон Ғаниева журналист Назира Иноятовага берган интервьюсида болалари учун жиддий қарорлар қабул қилгани, тунд ўтган болалиги ва маблағ сабаб ушалмаётган орзулари ҳақида гапирди.
— Болалигим билан боғлиқ хотираларни эслаш жуда оғир. Сабаби кунларимнинг жуда кўп қисми ёлғизликда ўтган. Онам машҳур актриса бўлгани учун иши жуда кўп эди. Боғчада ҳам махсус гуруҳга борганман. У ерда болалар ухлаб қоларди. Санъат интернат-мактабида ўқиганимда ҳам оиламдан йироқда эдим. Ёлғизлик инсон руҳиятига жуда оғир таъсир этаркан. Ҳалигача болалик билан боғлиқ воқеаларни эслаб, худди бўғзимга бир нарса тиқилиб тургандек бўлади. Онам ҳаётлигида бу ҳақда гапиришни истамасдим. Уни ҳам, ўзимни ҳам қийнагим келмаган. У вазиятда онамга ҳам осон эмасди. Соғлиғини тиклаш учун қўлимдан келган барча ишни қилганман.
Бу йил охирги концерт беришимни, бундан кейин “Райҳон шоу”лар ўтказилмаслигини айтдим. Бу қарор ҳақида бир неча йилдан буён ўйлайман. Ўғилларим ҳам 10 ёшга яқинлашиб қолишди. Улар айни ўқийдиган, нималарнидир ўрганадиган ва болалиги билан боғлиқ хотираларни ёдида сақлайдиган ёшда. Шу боис улар билан кўпроқ вақт ўтказишга ҳаракат қиламан. Агар зарур ишим бўлмаса, кўчага чиқмайман. Табиатан “оддий бека” ролидаги аёлман. Битта шоу дастурига эса камида 5-6 ой тинимсиз тайёргарлик кўраман. Турган гапки, бу вақтда оилага, хусусан, фарзандларимга етарлича эътибор беролмайман. Болаларим билан кўпроқ бирга бўлиш учун ҳам сўнгги шоуни беришга қарор қилдим. Болаларим мендек ёлғизликни ҳис қилишларини истамайман, — дейди хонанда Райҳон.
Хонанда шунча йил давомида нега ўзбек тилини мукаммал ўрганолмагани ва оиласида қайси тилда гаплашишларига ҳам ойдинлик киритиб ўтди.
— Мен боғча, мактаб ҳатто институтда ҳам рус гуруҳларида таҳсил олганман. Атрофимдаги инсонларнинг бари шу тилда мулоқот қилишарди. Рус тилида фикрлайман ва уни миямда таржима қилиб гапирсам, худди тўғри тушунтиролмаётгандек бўламан. Синглим эса болаликдан ўзбек тилини яхши ўзлаштирган. Ҳатто шундай вазиятлар ҳам бўлардики, синглим ўзбек тилини яхши билгани учун мен билишим керак бўлмаган гапларни онам билан ўзбек тилида гаплашарди (кулиб). Синглим ўзбекча фикрлайди ва у мендан фарқли хаёлан гапларини рус тилига таржима қилиб гапиради.
Турмуш ўртоғим Фарҳод ака ҳам рус тилида ўқигани билан ўзбек тилида эркин мулоқот қилолади. Аммо оилада рус тилида гаплашамиз, — дейди хонанда Райҳон.
Хонанда етим болалар учун мактабгача таълим муассасаси, ундан кейин клиника очишни ният қилгани, аммо уни амалга оширолмагани ҳақида гапирди.
— Ҳақиқатан ҳам эҳтиёжманд инсонларга ҳам хизмат кўрсатадиган боғча ва клиника очишни ният қилардим. Аммо ўрганиб чиқсам, иккисини очишга ҳам жуда катта маблағ сарфланар экан. Ўзи икки боламга жуда кўп маблағ сарфлайман, бизнес ҳақида ўйлашга ҳам қўрқиб қолдим. Катта эмас-у, кичик бизнесларни йўлга қўйгандим. Аммо бу борада тажриба ва билимсизлигим панд берди. Шу боис ҳозир тадбиркорлик борасидаги китобларни кўп ўқияпман. Балки кейинчалик орзуларимдан бирини амалга оширарман, — дейди хонанда Райҳон Ғаниева.
Изоҳ (0)