“Vest Hem” futbolchisi Lukas Paketa pul tikish orqali daromad qilish uchun atayin sariq kartochkalar olgani uchun futboldan butun umrga chetlatilishi mumkin, deya xabar bermoqda Daily Mail.
Manbaga ko‘ra, Paketa 2022-yilning noyabridan 2023-yil avgustiga qadar “Lester”, “Aston Villa”, “Lids” va “Bornmut”ga qarshi o‘yinlarda atayin sariq kartochkalar olganlikda ayblanmoqda.
Futbolchining o‘zi, shuningdek, uning 60 nafarga yaqin do‘stlari, tanishlari va qarindoshlari Braziliyada Paketaning sariq kartochka olishi uchun 7 dan 400 funtga qadar pul tikishgan. Yutuqnining umumiy narxi 100 ming funtni tashkil etadi.
Tergov boshlanganidan so‘ng, futbolchining xabarlari, qo‘ng‘iroqlari va bank ko‘chirmalarini tekshirish uchun telefoni olib qo‘yilgan. Shundan keyin telefon Lukasga qaytarib berilgan. Bir muddat vaqt o‘tgach, tergovchilar ba’zi tafsilotlarni aniqlash uchun yana telefonni so‘rashganida, Paketa uni tashlab yuborganini aytgan.
Shu sababli u ma’lumotlarni yashirish va tergovga to‘sqinlik qilishda ayblanmoqda.
Angliya futbol assotsiatsiyasi Paketani maydonda qasddan noto‘g‘ri harakatlar qilishda aybladi va yarim himoyachini umrbod futboldan diskvalifikatsiya qilinishini talab qilmoqda. Paketaning o‘zi esa bu ayblovlarni rad etmoqda.
27 yoshli Lukas 2022-yildan buyon “Vest Hem” sharafini himoya qilib kelmoqda. Undan avval esa futbolchi “Flamengo”, “Milan” hamda “Lion” kabi jamoalar sharafini himoya qilgan.
Izoh (0)