Ўзбекистонда пенсия тайинлаш тартибига бир қатор янгиликлар киритилмоқда. Бу ҳақда “Дарё” мухбири билан суҳбатда Пенсия жамғармаси бош мутахассиси Бахриддин Зиятов маълумот берди.
“Аризалар онлайн қабул қилинади”
Жорий йилининг 31-октябрдаги “Аҳолига пенсия тайинлаш бўйича кўрсатиладиган давлат хизматлари сифатини янада оширишга қаратилган қўшимча чора-тадбирлар тўғрисида”ги президент қарорига асосан тизимда бир қатор янгиликлар амалга оширилмоқда. Хусусан, қарорга биноан 2024 йил январдан бошлаб фуқароларга пенсия тайинлаш учун қўшимча равишда давлат хизматлари марказларига борган ҳолда ёки онлайн шаклда Ягона интерактив давлат хизматлари портали орқали ҳам мурожаат қилиш имконияти яратилади. Бунда онлайн ариза қолдириш мумкин бўлади. Тизим мурожаатни фуқародан автомат равишда қабул қилади.
Айтиш керак, 2022 йил июнга қадар пенсия тайинлаш учун фуқаролардан 14 ташкилотдан 36 тагача ҳужжат талаб қилинган. Уларни йиғишга 6 ойгача вақт сарфланарди. Бунунги кунда ўша маълумотлари электрон базада мавжуд бўлган фуқаролардан пенсия тайинлаш учун фақатгина паспорт талаб қилинади. Яъни ҳозир битта паспорт билан пенсия тайинлаш учун мурожаат қилиш мумкин.
Янги тартиб бўйича эса бу ҳолат янада такомиллаштирилмоқда ва онлайн равишда ариза топшириш имкони яратилмоқда. Бу фуқароларнинг оворагарчиликларига барҳам беради.
Яна бир ўзгариш ҳақида
Қарорга асосан, 2024 йил 1 январдан бошлаб жамғариб борилган пенсия маблағларини Ягона интерактив дават хизматлари портали ёки “Халқ банки”нинг мобил иловаси орқали олиш имконияти яратилади.
Ҳозирда жамғарилган маблағларни олиш учун фуқароларга Пенсия жамғармаси томонидан қоғоз шаклида сертификат берилади. Янги тартибга кўра, ўша қоғоз сертификат бериш бекор қилинади ва пулларни онлайн шаклда “Халқ банки”нинг мобил иловасидан ёки Ягона интерактив портал орқали олиш мумкин бўлади.
“Пенсия тайинлаш автоматлашади”
2025 йил 1 мартдан бошлаб эркаклар 60 ёшга етганда, аёллар 55 ёшга кирганда пенсиялари автоматик равишда (улардан бирор-бир ҳужжат талаб этмаган ҳолда) тайинланадиган бўлади. Бунда шахсга оид маълумотларни (фуқаронинг ёши, жинси, иш стажи, оиласи таркиби...) Адлия, Бандлик вазирликлари ва Солиқ қўмитасининг электрон ахборот базаларидан олинади. Ва пенсиялар автоматик тарзда тайинланади. Фуқарога: “сизга пенсия тайинланди”, деган SMS юборилади. Хабарда пенсия миқдори ҳам кўрсатилади.
Фуқаро 60 ёшга тўлгач, автоматик тайинланган пенсиясидан норози бўлса, масалан, яна ишламоқчилиги тўғрисида Пенсия жамғармасига мурожаат қилиши керак. Шунда фуқаронинг ихтиёри билан унга тайинланган пенсия пулини бериш тўхтатиб турилади. Кейинчалик пенсия яна тайинланиши мумкин. Бундай ўзгаришлар фуқароларга ҳужжат йиғиш ва Пенсия жамғармасига бориб, овора бўлишларининг олдини олиш мақсадида қилинмоқда.
Изоҳ (0)