“Онам актриса қизга уйланишимни истади”. Актриса Раъно Зокированинг ўғли ва келини билан суҳбат (видео)

“Дарё” интернет нашрининг YouTube’даги каналига Ўзбекистонда хизмат кўрсатган артист Раъно Зокированинг ўғли ва келини интервью беришди. Дилбар Зокирова “Сенсиз” сериалидаги роли билан билан томошабинларга яхши таниш. Ўғли Умид Зокиров эса истеъдодли режиссёрлардан бири ҳисобланади. Айни кунларда вайнерлик билан шуғулланаётган ёшлар қандай танишишгани ҳақидаги саволга қуйидагича жавоб беришди. 

— Ҳамма қатори совчи орқали танишдик. Умид ака ҳам ижодкор бўлса-да, аввалдан таниш бўлмаганмиз. Аммо қайнонам билан бир нечта теленовеллаларнинг суратга олинишида бирга ишлаганмиз. Ўзбекона оилада улғайганим учун катта ёшли инсонларни ҳурмат қиламан, устозларга чой бериб, меҳмон қилишни яхши кўраман. Раъно Зокировага ҳам шундай қилган эканман. У инсон буни кузатиб юрган экан. Бир кунги сёмкада “Ўғлим режиссёр, сизни видеога оламан. Балки, кун келиб ҳамкорликда ишларсизлар”, деди. “Ҳўп” деб видеога тушиб бердим. Аммо мақсад бутунлай бошқа бўлган экан, — дейди Дилбар Зокирова. 

Умид Зокировнинг айтишича, онаси унинг актриса билан оила қуришини истаган. Бунинг сабаби эса қуйидагича:

— Уйланиш ёшига етгандан кейин оналар келин излашга тушиб қолишаркан. Ойим ҳам сёмкага борсалар ёки кўча-куйда яхши қизларни учратиб қолса, дарров расм ёки видеосини олиб келарди. Сёмкадан қайтгач Дилбарнинг видеосини кўрсатиб, роса мақтади. “Қош-кўзлари чиройли, унинг устига актриса. Сени тушунади, қўллаб-қувватлайди”, деди. Чунки ижодкорларнинг бошқа соҳа вакили билан оила қуриб, бахтли яшаши бу чинакамига омад. Чунки кўп ҳолларда сёмкадан кеч қайтса ёки бошқа актёрлар билан экрандаги муносабатини нотўғри талқин қилишади. Хуллас,  мақтовларга унчалик эътибор бермадим. Аммо видеодаги қиз ҳам ҳаёлимдан кетмади, — дейди Умид Зокиров. 

Дилбар Зокирова турмуш ўртоғини илк марта учратганда кўнглидан нималар ўтгани ва титраган меню воқеаси ҳақида сўзлаб берди. 

— Илк учрашувда ўзимизни хотиржамдек тутишга ҳаракат қилганмиз. Менимча, бу ишни ҳаммадан ҳам кўра мен уддалаганман. Ойижон. Умид акам ва мен овқатланишга кирдик. “Оналари машҳур актриса, бўлар ҳам ўзларича манман”, бўлса керак деб ҳаёлимдан ўтказгандим. Аммо менюдан овқат танлаш арафасида унинг тинимсиз титраётгани эътиборимни тортди. Бир у кишининг, бир ўзимнинг қўлимга қарайман. Менда ҳеч қандай ўзгариш йўқ. Ичимда ўз-ўзимни койидим. Чунки одамда учрашувга чиққанда қизлар уялиб, ҳаяжонланиши керак. Бизда эса акси бўлди. Мана шундан кейин тўй ҳақида ўйлаб кўришга қарор қилдим. Чунки ҳозирги кунда бундай йигитлар жуда кам, — дейди Дилбар Зокирова.