Исроил бош вазири Биньямин Нетаньяху вазирлар маҳкамаси йиғилишида Эроннинг ракета ҳужумига изоҳ берди.
У Исроил ҳудудига берилган зарбаларни “катта хато” деб атади ва Теҳрон ўз ҳаракатлари учун товон тўлашини айтди.
“Бугун тунда Эрон яна юзлаб ракеталар билан Исроилга ҳужум қилди. Бу ҳужум муваффақиятсиз якунланди. Исроил ҳаво мудофааси сабабли бунинг олди олинди. Эрон бугун катта хатога йўл қўйди ва бунинг учун жавоб беради”, деди Нетаньяху.
Унинг таъкидлашича, Эрон томони Исроилнинг “ўзини ҳимоя қилиш ва душманлардан ўч олиш қатъиятини тушунмайди”.
Бенямин Нетаньяху Исроил ягона қоидага амал қилишини қўшимча қилган:
“Ким бизга ҳужум қилса, биз ҳам унга ҳужум қиламиз”.
Бош вазир, шунингдек, Исроил армиясига мамлакат хавфсизлигини таъминлагани учун, шунингдек, Эрон ракеталарини уриб туширишда ёрдам бергани учун АҚШга миннатдорчилик билдирган.
Бир кун аввал Эрондан Исроилга юзлаб ракеталар учирилган эди. Исроил армиясига кўра, ракеталарнинг аксарияти уриб туширилган, бироқ бир қисми очиқ ҳудудларга қулаган.
Изоҳ (0)