Президент Шавкат Мирзиёэв Париждаги ёзги Олимпия ўйинларида Ўзбекистон спорт делегациясига навбатдаги олтин, кумуш ҳамда бронза медалларини келтирган спортчилар — боксчилар Баҳодир Жалолов ва Абдумалик Ҳалоков, эркин курашчилар Разамбек Жамалов ва Ғуломжон Абдуллаэв, таэквондочи Светлана Осипова ва оғир атлетикачи Акбар Жўраэв билан телефон орқали мулоқот қилди.
Давлат раҳбари бутун халқ номидан чемпион ва совриндорларни самимий табриклаб, мураккаб курашларда кўрсатган юксак маҳорати ва матонати учун миннатдорлик билдирди. Уларнинг ота-оналари ва мураббийларига эл-юртга муносиб шундай ўғил-қизларни тарбиялагани учун раҳмат айтди.
Сен Ўзбекистон аёллари орасида биринчи бўлиб таэквондо бўйича Олимпия медали совриндори бўлдинг. Барчамиз ҳар бир чиқишингни ҳаяжон билан кузатдик. Юксак жанг санъати ва ҳақиқий жангчи руҳини намойиш этдинг. Сен билан жуда фахрланамиз, дейди президент Светлана Осиповага.
Президент икки карра Олимпиада чемпиони Баҳодир Жалолов билан суҳбатда боксчини тарихий ғалаба билан табриклади:
Энг оғир вазнда тенгсиз эканингни яна бир бор бутун дунёга кўрсатдинг. Бу бизларга жуда катта фахр, ғурур-ифтихор бағишлади. Парижда ҳам олтин олиб келишга ваъда берган эдинг, бугунги тарихий зафаринг шу ваъдага мос бўлди. Катта-катта ғалабалар ҳали олдимизда. Пойтахтимизда номингга очилган бокс бўйича спорт маҳорати мактабида яна юзлаб, минглаб ўзбек баҳодирлари катта рингларга тайёрланишига ишонаман.
Фурсатдан фойдаланиб, давлат раҳбари боксчиларнинг бош мураббийси Тўлқин Қиличев тезда соғайиб кетишини тилади.
Спортчилар президентнинг шахсий эътибори уларга кучли мотивация бергани, мукаммал тайёргарлик кўришлари учун барча имконият яратилганини қайд этиб, ташаккур изҳор этдилар. Ўзбекистон спортининг янги тарихини яратишда келгусида ҳам астойдил меҳнат қилишга, янада юксак марраларга эришишга ваъда бердилар.
Изоҳ (0)