Франция президенти Эммануэл Макрон Исроил Ғазони бомбардимон қилишни ва тинч аҳоли, жумладан, аёллар ва болаларни ўлдиришни бас қилиши кераклигини айтди. Бу ҳақда Deutsche Welle хабар берди.
Макроннинг таъкидлашича, Франция ҲАМАСнинг террорчилик ҳаракатларини аниқ қоралайди, бироқ Исроилнинг ўзини ҳимоя қилиш ҳуқуқини тан олиб, уни Ғазодаги бомбардимонларни тўхтатишга чақиради.
Исроил халқаро қонунларга мувофиқ ҳарбий нишонларга ҳужум қилаётгани ва тинч аҳоли қурбонларини камайтириш чораларини кўраётгани, масалан, зарбалар олдидан огоҳлантиришлар бериш ва одамларни эвакуация қилишга ундашини айтмоқда.
Бироқ фактлар бунинг аксини тасдиқлайди, жумладан, 7 октябрдан буён Ғазога берилган зарбалар оқибатида ҳалок бўлганлар сони 11 минг кишидан ошди, уларнинг тўрт мингдан ортиғи болалардир. Бундан ташқари, техникалар етишмаслиги сабабли вайроналар остидан жароҳатланганларни олиб чиқиш имконияти йўқ. Ўз навбатида, бу ҳалок бўлганлар сонининг ортишига сабаб бўлиши мумкин.
Исроил бош вазири Биньямин Нетаньяхунинг идораси Макроннинг баёнотига тезда жавоб бериб, давлатлар Исроилни эмас, ҲАМАСни қоралаши кераклигини айтди.
“Тинч аҳолига етказилган ҳар қандай зарар учун жавобгарлик Исроил эмас, ҲАМАС зиммасига юклатилади”, — деди Нетаняху.
Елисей саройида журналистлар билан суҳбатлашган Макроннинг сўзларига кўра, Ғазо секторини бомбардимон қилиш учун “ҳеч қандай асос” йўқ ва ўт очишни тўхтатиш “Исроилга фойда келтиради”.
Изоҳ (0)