Кўпчилик миллиардер аёл ҳақида эшитганда дарҳол энг сўнгги урфда кийинган, мукаммал соч турмаги ва макияждаги аёлни тасаввур қилади. Forbes маълумотларига кўра сайёрадаги энг бой аёллар қандай кўринишга эга эканлигини кўрамиз.
L'Oreal меросхўри — Франсуаза Беттенкюр-Меерс
2023 йилда Forbes рўйхатининг биринчи ўрнини L'Oreal косметика компанияси асосчисининг набираси Франсуаза эгаллади. Унинг бойлиги 80,5 миллиард долларга баҳоланмоқда. Меросхўр ҳашаматли ҳаётидан бутунлай воз кечади ва ўзини болаларини тарбиялашга, пианино чалишга ва Библияга шарҳлар ёзишга бағишлайди. Суратдан 70 ёшли миллиардер визажист ва сартарош хизматларидан фойдаланмаслигини кўриш мумкин. Енгил макияж, ёйилган ёки оддий қилиб йиғилган соч, пиджак ва ёрқин рангдаги шарф — миллиардер аёл одатда шундай юради.
Энг бой бева аёл — Жулия Кох
Эрининг ўлимидан сўнг Жулия болалари билан Koch Industries компаниясининг 42 фоизини мерос қилиб олган. Аммо аёл ҳаётида бой бизнесмен пайдо бўлишидан олдин мода оламида ўз карьерасини қураётган эди. Миллиардер моделер Адолфо Сардиниянинг шахсий ёрдамчиси бўлиб ишлаган, Меt Gаlа’да иштирок этган, кейинроқ Vogue бош муҳаррири Анна Винтур билан ҳамкорлик қилган. 61 ёшли меросхўр ҳозирда Коch Industries директорлар кенгашини бошқаради ва сокин ҳаёт тарзини олиб боради.
Шуниси эътиборга лойиқки, Жулия мунтазам равишда гўзаллик салонига ташриф буюради, замонавий косметологиянинг барча муолажаларидан баҳраманд бўлади. Тадбирларга ҳар доим қиммат брендларда кийинади. Оригинал ва нафис либосларидан унинг бадавлат аёл экани дарҳол билинади.
Улгуржи ва чакана савдо компанияси асосчисининг қизи — Элис Уолтон
Отасининг Walmart компанияси акциялари ўсганидан сўнг Уолтоннинг бойлиги 56,7 миллиард долларни ташкил қилди. Университетдан сўнг Элис компанияда ишлай бошлайди ва карьера зинапоясидан кўтарилади. Аммо тез орада миллиардер аёл бизнесдан чарчайди ва от боқадиган ранчога кўчиб ўтади. Ўшандан бери Элис Уолтон Walmart бизнесида иштирок этмайди. Ижтимоий тадбирларда миллиардер камдан кам кўринади ва камтарона кийинади.
“Ширин ҳаёт” соҳибаси — Жаклин Марс
1911 йилда Франклин Маrs ширинлик компаниясига асос солади, шу туфайли бугунги кунда унинг набираси Жаклин энг бой аёллар рўйхатида турибди. Ҳозирда ҳам миллиардер аёл оилавий тадбиркорлик ва хайрия жамғармасини ривожлантиришда фаол иштирок этмоқда. 2023 йилда Жаклиннинг бойлиги 38,3 миллиард долларга баҳоланди. Миллиардларнинг эгаси Маrs брендининг элчисига ўхшайди: ёрқин макияж, қуёшда тобланган юз, қулоқ ва бўйиндаги қимматбаҳо олмослар, гулли кийимлар уни бошқалардан ажратиб туради.
.jpg)
Сиёсатдаги кучли аёл ва казино эгаси — Мириам Аделсон
Мириам Аделсон дунёдаги энг кучли сиёсий аёллардан бири ҳисобланади, у 2012 йилги сайловлар учун 41,5 миллион доллар ажратган. Шунингдек, исроиллик аёл дунёдаги энг йирик казино тармоқларидан бири — Las Vegas Sands корпорациясининг ҳаммуассиси ҳисобланади. 2023 йилда Мириамнинг бойлиги 35 миллиард долларга баҳоланди. Бундан ташқари, у турмуш ўртоғи билан биргаликда гиёҳвандликка қарши тадқиқот ва даволаш клиникасига асос солган, бу ҳозирда дунёдаги энг йирик клиника ҳисобланади.
Миллиардер ҳар доим қимматбаҳо матолардан тикилган чиройли костюмлар, текис қилиб ёйилган соч, ингичка гардишли кўзойнак ва ним табассум билан кўчага чиқади.
“Ҳаммасига ўзим эришганман” — Рафаэла Апонте
Бугунги рўйхатда ўз миллиардларини мустақил ишлаб топган биринчи аёл — Рафаэла Апонте. Италиялик ишбилармон аёл ва унинг турмуш ўртоғи Жанлуижи Апонте МСS юк ташиш компаниясининг ҳаммуассиси ҳисобланади. Эр-хотин шахсий ҳаёти каби бизнесини ҳам реклама қилмайди. Рафаэла кемаларнинг ички дизайни билан шахсан шуғулланади. Миллиардер камдан кам ҳолларда омма олдига чиқади. Чиққанда ҳам катта олтин тақинчоқлар, ёрқин рангга бўялган кўзлар ва қора либос — ҳақиқий италянча услубни афзал кўради.
Германиянинг энг бой аёли — Сюзанна Клаттен
2023 йилда Сюзанна немис автомобиль ишлаб чиқарувчи BMW’нинг 19 фоиз улушига эгалик қилади, уни ота-онасидан мерос қилиб олган. Шунингдек, у Алтана кимё компаниясига эгалик қилади, бу ҳам унинг капиталига таъсир қилади. Энг бой немис аёлининг умумий бойлиги 27,4 миллиард долларни ташкил қилади. 61 ёшли Сюзанна қисқа соч турмагини ёқтиради, бизнес костюмлари ва юмалоқ сирғаларни афзал кўради. Немис аёли косметик хизматлардан фойдаланади ва тўғри овқатланади, чунки барча фотосуратларда нозик кўринади.
“Карьерасини машаққат билан қурган” — Жина Рейнхарт
Жина бизнесда провокатор ҳисобланади, чунки у кўпинча турли вазиятлар ҳақида жуда қаттиқ гапиради ва қатъий турмуш тарзини тарғиб қилади. Отаси Hancock Prospecting Group темир рудаси бизнесини қурган. Аммо оила бошлиғи вафотидан кейин компаниянинг миллиардлаб долларлик капитали атиги 125 миллионни ташкил этган. Жинанинг дадаси яна уйланади ва янги севгилиси бошини шу қадар айлантирадики, Ланг Ханкок бизнесидан воз кечади. Жина бир неча йил ичида уни 29,17 миллиард долларга кўтаради. У ўз фарзандларининг ҳеч бирида бизнесининг муносиб давомчисини кўрмайди, шу сабаб уларнинг меросга эга бўлиш санасини 2068 йилда — тўнғич ўғли 92 ёшга тўлганда деб, белгилаб қўйган.
Узоқ давом этган суд жараёнлари Жина бойлигининг чорак қисмини йўқотишига олиб келди. 2023 йилда бойлиги 27 миллиард долларга баҳоланди. Бадавлат австралиялик ўзининг ташқи кўринишига эътибор бермайди: табиий қариш ва оқарган сочлар, енгил-елпи макияж ва мос тушмайдиган кийимлар. Кўринишидан, у ўзини бизнесга 100 фоиз бағишлаган кўринади.
Ажрашгандан сўнг миллиардерга айланган аёл — Маккензи Скотт
Amazon интернет-дўконининг асосчисидан ажрашганидан сўнг Маккензи Скотт 24,4 миллиард долларни қўлга киритади. Собиқ эри билан миллиардер бизнес қуришнинг бошиданоқ бирга бўлиб, унинг ўнг қўли эди. Маккензи бутун умри давомида ёзувчи бўлишни хоҳлаган, ҳатто “Лютер Олбрайтнинг судланиши” дебют романи учун Америка китоб мукофотини қўлга киритган. Бироқ у китобини собиқ эрининг платформасида нашр этишдан қатъиян бош тортади. 53 ёшли миллиардер тадбирларга классик либосларда боради, бу эса унинг қоматини таъкидлайди. Кундалик ҳаётда эса папараццилар миллиардерни спорт костюмлари ва ҳеч қандай макияжсиз юрганини кўп бора суратга олган.
Рўйхатдаги охирги фахрий ўрин — Ирис Фонтбона
Ирис Фонтбона Лотин Америкасидаги энг бой аёл, чунки саноатчи эри вафотидан кейин у бутун меросга эгалик қилади. Металлургия компаниясидан ташқари, Ириснинг бойлиги Хорватиядаги иккита меҳмонхона тармоғи, транспорт компаниялари қимматли қоғозлари ва турли акцияларни ўз ичига олади. Миллиардер ҳозирда 81 ёшда ва у компания ишлари билан шуғулланишда давом этмоқда. Ирис барча тадбирларда унинг миллиардер мақомини аниқ тасдиқлайди — табиий гўзалликни, замонавий образларни ва рангларнинг қизиқарли комбинациясини, нафис заргарлик буюмларини таъкидлайдиган макияж бунинг исботи. Миллиардернинг бойлиги 23,1 миллиард долларга баҳоланди.
Изоҳ (0)