Ўзбекистон миллий жамоаси ва Франциянинг “Ланс” клуби ҳимоячисининг трансфер нархи икки баробарга ўсди.
Статистик маълумотлар билан шуғулланувчи Transfermarkt портали 20 ёшли ўзбекистонлик футболчининг нархини янгилади. Унга кўра, Абдуқодир Ҳусанов 5 миллион еврога баҳоланган. 2024 июнда янгиланган маълумотларга кўра, унинг баҳоси 2,5 миллион эди.
Шу тариқа, Ҳусанов бу борада Элдор Шомуродовга етиб олди. Портал Ўзбекистоннинг энг қиммат футболчиси сифатида Аббосбек Файзуллаевни кўрсатган. Унинг нархи 6 миллион еврони ташкил этади.
Ёш бўлишига қарамай, Абдуқодир Франция клубининг асосий таркибида ўйнаб келмоқда. Таниқли Sofascore спорт портали сентябрь ойи учун 21 ёшгача бўлган энг яхши ёш футболчилар рамзий жамоасини эълон қилди. Ушбу жамоага Беллингем, Ямал билан бир қаторда Абдуқодир ҳам ўрин олди.
Франция чемпионатининг 4-туридан ўрин олган “Ланс” — “Лион” учрашувида Ҳусанов энг яхши ўйинчи деб топилди.
Изоҳ (0)