Бугун, 22 ноябрь куни Олий Мажлис Қонунчилик палатасининг “Ҳукумат соати”да энергетика вазири Жўрабек Мирзамаҳмудов куз-қиш мавсумига кўрилган тайёргарлик тўғрисида ҳисобот берди.
Вазирнинг айтишича, жорий куз-қиш даврида Ўзбекистонда электр энергиясига бўлган талаб 45 миллиард кв/соатга етиши кутилмоқда. Бу ўтган йилнинг шу давридагига нисбатан 3,5 миллиард кв/соатга кўп дегани.
“Ушбу талабни қондириш учун жами 42,6 миллиард кв/соат электр энергияси ишлаб чиқариш режалаштирилган. Бунинг учун ИЭСларга 8,5 миллиард кубометр табиий газ (кунига 46,6 миллион кубометрдан), 2,9 миллион тонна кўмир (кунлик 15 минг тонна) етказиб берилади. Кўмирнинг 1,1 миллион тоннаси импорт ҳисобидан етказилади. Шунингдек, кунига 2500 тонна мазут етказиш кўзда тутилган. Қўшни давлатлардан 5,2 миллиард кв/соат электр энергияси импорт қилиниши режалаштирилган”, — деди вазирлик раҳбари.
Жўрабек Мирзамаҳмудовнинг таъкидлашича, ўтган йилги аномал совуқ пайтидаги газ тақчилликлари ҳисоб-китоб қилинган. Агар худди шундай об–ҳаво такрорланса, қандай чора кўрилиши аниқ белгилаб олинган.
“Дастлабки ҳисоб-китобларга кўра, январнинг энг совуқ кунларида кунлик 273-280 миллион кв/соат электр истеъмоли кутилмоқда. Шундан 253-255 миллион кв/соатини ишлаб чиқариш ҳисобидан таъминлаймиз. Қолган 19,4 миллион кв/соати импорт қилинади. Агар дефицит мавжуд бўлса, аввало уни электр энергияси экспортини кунига 6 миллион кв/соат қисқартириш ҳисобидан қопланади. Шу билан бирга, мазут ёқилғиси сарфини кунига 10 минг тоннагача ошириб, қўшимча 10 миллион кв/соат электр энергияси ишлаб чиқариш ҳисобига ҳамда электрни иқтисод қилиш орқали кунига ўртача 12 миллион кв/соат энергияни тежаш ҳисобига қопланади. Бунда 838 та истеъмолчилар юкламасини тунги режимга ўтказиш ҳисобига тиғиз вақтларда 1450 мегаватт қувватни бўшатиш имконияти пайдо бўлади”, — деди у.
Вазир сўзи давомида табиий газга бўлган талабни қондириш борасида бажарилган ишлар тўғрисида ҳам гапирди. Унинг маълум қилишича, куз-қиш даврида республикада табиий газга бўлган талаб 28 миллиард кубометрни ташкил этиши (2022 йилгидан 2,5 миллиард кубометр кўп) кутилмоқда.
“Ушбу талабни қоплаш учун “Ўзбекнефтгаз” АЖ томонидан 16,2 миллиард кубометр, хорижий ва қўшма корхоналар томонидан 10 миллиард кубометр табиий газ қазиб чиқариш таъминланади. Хабарингиз бор, эришилган келишувларга асосан, қўшни давлатдан ҳамда шимолдан қўшимча газ импорт қилиб, ички бозорга йўналтиришни таъминлаяпмиз. Қишга тайёргарлик доирасида ер ости омборларида 3,5 миллиард кубометр табиий газ захираси яратилди”, — дея таъкидлади вазир.
Жўрабек Мирзамаҳмудовнинг қўшимча қилишича, Ўзбекистонда ўтган йилги аномал совуқ даврида кунига 21,6 миллион кубометр газ тақчил бўлган.
“Шунинг ўрнини қоплаш манбалари бўйича аниқ ҳисоб-китоблар қилинди. Энг аввало, ер ости газ сақлаш омборларидан ўтган йили кунлик 18–20 миллион кубометр табиий газ олинган бўлса, бу йил кунига 35–40 миллион кубометргача олиш имкони яратилди. Аномал совуқ кунлари GTL заводига 5 миллион кубометр газ беришни қисқартирамиз. Шу билан бирга, заправкаларга ҳам газ беришни 30 фоизга қисқартириш ҳисобидан газ дефицити қопланади. Бу фақатгина аномал совуқ кунларга режалаштирилган”, — деди энергетика вазири.
Маълумот учун, Ўзбекистонда 287 та газ конлари бўлиб, шундан 123 таси “Ўзбекнефтгаз” тасарруфида. Мамлакатдаги умумий газ захираларининг ҳажми 1,8 триллион куб метр. Шундан 50 фоизи — 900 миллиард куб метри “Ўзбекнефтгаз” конларидаги газ захиралари ҳисобланади.
Изоҳ (0)