Республикачилардан АҚШ президентлигига номзод Никки Хейли келаси йилги сайловларда ғалаба қозонса, “Толибон” назорат қилаётган Афғонистонга АҚШнинг барча ёрдамларини тўхтатишини айтди.
Американинг Washington Freebeacon нашрига берган интервьюсида Хейли Жо Байден ҳукуматининг “Толибон”га нисбатан олиб бораётган сиёсатини қаттиқ танқид қилди.
Унинг сўзларига кўра, Афғонистондан АҚШ қўшинлари “ҳалокатли тарзда олиб чиқиб кетилганидан” икки йил ўца ҳам, Байден америкалик солиқ тўловчиларнинг пулларини “Толибон”га жўнатишда давом этмоқда.
“Толибон қўшинларимизни ўлдирган ва ўз халқини қийноққа солаётган террорчи режим”, — деб таъкидлади у.
Хейли агар у президент бўлса, “террорчи, Американи ёмон кўрадиган давлатларга” бир цент ҳам юбормаслигини айтди.
АҚШда 2024 йилги президентлик сайловлари учун бошқа номзодлар ҳам Байден маъмуриятининг Афғонистондаги сиёсати ва мамлакатдан АҚШ аскарларини эвакуация қилиш усулини қаттиқ танқид қилганди. Жумладан, Дональд Трамп Афғонистонда “Толибон”нинг ҳокимият тепасига келишида Байденни жавобгар деб ҳисоблайди.
Афғонистонни қайта тиклаш бўйича махсус инспектор идораси (SIGАR) маълум қилишича, “Толибон” ҳукумат тепасига келганидан буён АҚШ Афғонистонга 2,35 миллиард доллардан ортиқ ёрдам кўрсатган
Идора АҚШ ҳалигача Афғонистон халқи учун энг катта донор эканини таъкидлади.
Изоҳ (0)