Энергетика вазири Жўрабек Мирзамаҳмудов “Лолазор” подкастида қиш мавсуми учун Ўзбекистондаги газ омборларига 5,1 миллиард куб метрдан ортиқ газ захираси жамланганини маълум қилди.
Вазирнинг билдиришича, бугунги кунда энергетика соҳасига фақат куз-қиш эмас, ёз мавсуми ҳам кирди. Сабаби ёзда ҳарорат ошиши билан электр энергияси истеъмоли ортмоқда. Фақат Ўзбекистонда эмас, бошқа давлатларда ҳам, ҳатто энергия тизими барқарор бўлган Россиянинг бир неча ҳудудларида ҳам ёзда чекловлар жорий этилди.
Жўрабек Мирзамаҳмудовнинг таъкидлашича, энергетиклар тайёргарлиги доим бўлган, лекин бу йилги куз-қиш мавсумига тайёргарлик барвақт бошланди.
“Февраль ойидаёқ президентимиз топшириқ берганлар. Тизимларни тайёрлаш, мавжуд камчиликлардан келиб чиққан ҳолда, сабоқларни инобатга олган ҳолатда барча тизим — қазиб чиқариш бўладими, етказиб бериш, тақсимлаш ва энг асосийси генерация масалаларига катта эътибор берилди”, деди вазир.
Жўрабек Мирзамаҳмудовинг таъкидлашича, қўшимча қувватларни ишга тушириш ҳам муҳим бўлди, чунки олдинги йилларда энг катта муаммо генерацияда эди. Истеъмол ошиб борган, янги қувватлар албатта қўшилган, лекин етарли даражада бўлмаган.
Бу йилда эса энг асосийси жуда катта ҳажмда қайта тикланувчи энергия манбаларидан фойдаланиб, генерация қувватларини оширишга эришилди. Энг асосийси, тайёргарлик юқори даражада бўлди. Барча турдаги захиралар, ёқилғи захиралари тайёрланди. Биринчи ўринда табиий газни ер остига йиғиш жараёни бошланди.
“Бизда ҳозир қиш мавсуми учун ерости газни сақлаш омборларига 5,1 миллиард куб метрдан ортиқ газ захираси йиғилди. Агар солиштирадиган бўлсак, бу ўтган йилги ҳажмга нисбатан 1,1 млрд куб метр кўпроқ”, деди энергетика вазири.
Энергетика вазири 2023 йилда “Дарё”га берган интервьюсида нима учун мамлакатда талаб бўла туриб, табиий газ чет элга экспорт қилиниши ҳақида изоҳ берганди. Унда табиий газ импорт қилиш сиёсат билан боғлиқ эмаслигини таъкидлаб ўтганди.
Жўрабек Мирзамаҳмудов 2024 йил май ойида берган интервьюсида Ўзбекистондаги 85 фоиз конлардан табиий газ қазиб олиб бўлинганини айтган эди.
Изоҳ (0)