Энергетика вазири Россиядан газ импорт қилишнинг сиёсий оқибатлари қанчалик ҳисобга олингани ҳақидаги саволга жавоб берди

Ўзбекистоннинг Россиядан табиий газ импорт қилиши сиёсат билан боғлиқ эмас. Бу ҳақда энергетика вазири Жўрабек Мирзамаҳмудов “Дарё” нашрига берган интервьюсида айтиб ўтди.

Энергетика вазири журналистнинг “Ёнимиздаги Туркманистонда жуда ҳам кўп газ бор, лекин узоқроқ жойдан оляпмиз. Бунинг харажатлари ҳам кўп, ҳамда сиёсий оқибатлари ҳам ҳисобланганми” деган саволига жавоб берди.

Буни қандайдир сиёсат билан боғлаш нотўғри, деб ҳисоблайман. Бу тижорий муносабатлар. Биз Туркманистондан ҳам газ импорт қиламиз. Ўтган йил ҳам, бу йил ҳам туркман ҳамкорларимиз билан жуда яхши ишлаяпмиз бу йўналишда. Нафақат табиий газ, биз улардан электр энергияни ҳам импорт қиламиз. Айниқса, қишда жуда катта миқдорда электр энергия етказиб беради. Ундан ташқари уларнинг электр энергиясини Қирғизистонга транзит қиламиз.

Энергетика йўналишида Туркманистон билан ҳамкорлигимиз жуда яхши ўрнатилган. Ҳамкорлигимиз дўстона ва икки тарафлама манфаатли. Россиядан олишимизнинг сабаби бу қўшимча, чунки эҳтиёж ошиб бормоқда, — деди Жўрабек Мирзамаҳмудов.

Аввалроқ октябрь ойида Мирзиёев, Путин ва Тўқаев Қозоғистон орқали Ўзбекистонга Россия гази етказилишига старт берилган эди.