Халқаро энергетика агентлиги (IEA) баёнотида айтилишича, Европа Иттифоқи (ЕИ) давлатлари 2022 йилда юқори нархлар туфайли газ импортига сарфлаган харажатларини ўтган йилга нисбатан уч баравар кўпайтирди — деярли 400 миллиард евро. Бу ҳақда “ТАСС” хабар берди.
Талабнинг тарихий пасайишига қарамай, 2022 йилда Европа Иттифоқининг газ импортига сарфлаган харажатлари деярли 400 миллиард еврони ташкил этди, бу 2021 йилга нисбатан уч баравар кўп, — дейилади ҳисоботда.
Россиянинг ЕИ табиий газга бўлган умумий талабидаги улуши 2021 йилдаги 40 фоиздан 2022 йил охирига келиб 10 фоиздан ҳам камроққа тушди, аммо нархларнинг кескин ўсиши Россияга 2022 йил давомида сезиларли даромад келтирди.
IEA маълумотларига кўра, 2022 йилда Россиянинг Европа Иттифоқига газ экспортидан тушган даромади бир йил аввалги 41 миллиард доллардан 94 миллиард долларга, Норвегия — 33 миллиард доллардан 111 миллиард долларга, Жазоир — 11 миллиард доллардан 20 миллиард долларгача ошган.
Европа Иттифоқининг бошқа етказиб берувчилардан LNG сотиб олишга сарфлаган харажатлари 32 миллиард доллардан 121 миллиард долларга, деярли тўрт баравар кўпайди.
Умуман олганда, Европада табиий газ истеъмоли 2022 йилда 13 фоизга камайди, бу минтақадаги талабнинг энг катта пасайиши ҳисобланади.
Аввалроқ Европада газ нархи 2021 йил июлдан бери энг паст даражага тушгани ҳақида хабар берилганди.
Изоҳ (0)