Мотор ёғлари регенерацияси бўйича Uz-Prista Recycling Ўзбекистон-Болгария қўшма корхонасининг очилишига бағишланган тантанали маросим Тошкент вилоятидаги «Ангрен» махсус индустриал зонасида бўлиб ўтди. Бу ҳақда «Газета.uz» хабар бермоқда.
Видеоконференция режимида ўтказилган ҳамда «Ўзбекистон нефть ва гази» (OGU-2016) халқаро кўргазмаси ва конференцияси очилишига мосланган маросимда Ўзбекистон бош вазирининг ўринбосари Ғуломжон Ибрагимов ва Болгария бош вазири Бойко Борисов иштирок этди. Улар старт тугмасини биргаликда босган ҳолда заводни ишга туширди.
Корхона йилига 43 минг тонна фойдаланилган ёғни қайта ишлаб, 30 минг тонна ёғ ишлаб чиқаришни режалаштирмоқда. Лойиҳага киритилган инвестицияларнинг умумий ҳажми 30 миллион долларга тенг.
Маросимда қилган чиқишида Болгария бош вазири лойиҳанинг инновацион эканлигини алоҳида таъкидлади. Фойдаланилган мотор ёғи — табиатни ифлослантирувчи маҳсулот, аммо бу маҳсулот қайта ишланиб, дизель ёқилғисига ёки янги мотор ёғига, шунингдек, асфальтга айлантирилиши мумкин. Бундан ташқари, янги ишлаб чиқариш янги иш ўринлари демакдир.
Шунингдек, Бойко Борисов Болгария Ўзбекистонни эски ҳамкор сифатида кўришини қайд қилиб ўтди.
«Мамлакатларимиз ўртасидаги ҳамкорлик янада ривожланишидан умид қиламиз», — деди у.
Бир қатор икки томонлама учрашувларни ўтказиш мақсадида Ўзбекистонга ташриф буюрган Болгария делегацияси таркибига, шунингдек, минтақавий ривожланиш вазири ва энергетика вазири ўринбосари кирди.
Изоҳ (0)