Energetika vaziri Rossiyadan gaz import qilishning siyosiy oqibatlari qanchalik hisobga olingani haqidagi savolga javob berdi

O‘zbekistonning Rossiyadan tabiiy gaz import qilishi siyosat bilan bog‘liq emas. Bu haqda energetika vaziri Jo‘rabek Mirzamahmudov “Daryo” nashriga bergan intervyusida aytib o‘tdi.

Energetika vaziri jurnalistning “Yonimizdagi Turkmanistonda juda ham ko‘p gaz bor, lekin uzoqroq joydan olyapmiz. Buning xarajatlari ham ko‘p, hamda siyosiy oqibatlari ham hisoblanganmi” degan savoliga javob berdi.

Buni qandaydir siyosat bilan bog‘lash noto‘g‘ri, deb hisoblayman. Bu tijoriy munosabatlar. Biz Turkmanistondan ham gaz import qilamiz. O‘tgan yil ham, bu yil ham turkman hamkorlarimiz bilan juda yaxshi ishlayapmiz bu yo‘nalishda. Nafaqat tabiiy gaz, biz ulardan elektr energiyani ham import qilamiz. Ayniqsa, qishda juda katta miqdorda elektr energiya yetkazib beradi. Undan tashqari ularning elektr energiyasini Qirg‘izistonga tranzit qilamiz.

Energetika yo‘nalishida Turkmaniston bilan hamkorligimiz juda yaxshi o‘rnatilgan. Hamkorligimiz do‘stona va ikki taraflama manfaatli. Rossiyadan olishimizning sababi bu qo‘shimcha, chunki ehtiyoj oshib bormoqda, — dedi Jo‘rabek Mirzamahmudov.

Avvalroq oktyabr oyida Mirziyoyev, Putin va To‘qayev Qozog‘iston orqali O‘zbekistonga Rossiya gazi yetkazilishiga start berilgan edi.