Айни вақтда президент Шавкат Мирзиёев Янги Андижон туманида вилоят фаоллари ва масъуллар иштирокида видеоселектор йиғилишини ўтказмоқда. Бу ҳақда “Дарё” мухбири хабар берди.
Давлат раҳбари масъулларга замонавий кўмир когенерациясини (яъни, бир пайтда иссиқлик ва электр энергиясини ишлаб чиқаришни) жорий қилиш бўйича топшириқ берди.
“Мисол учун, жорий йилда Андижон, Қувасой, Қўқонда, “Янги Андижон” ва “Эко Фарғона” массивларида когенерация лойиҳалари амалга оширилади. Лекин, бу жуда кам. Бор имкониятлардан фойдаланаётганимиз йўқ”, — деди президент.
Шавкат Мирзиёев барча ижтимоий объектлардаги 3 мингта эскирган қозонларни замонавий ускунага алмаштириш зарурлигини айтди. Бунда, Иқтисодиёт ва молия вазирлиги 2023 йилда давлат-хусусий шерикчилик асосида 250 миллиард сўм ажратади.
“Водийда йилига 120 миллион куб метр газ сарфлаётган 170 та иссиқхона, 64 та ғишт ва оҳак корхоналарини кўмирга ўтказишни тезлаштириш керак. Йил якунига қадар 500 та кўп қаватли уйларнинг энергия тежамкорлигини ошириш керак. Бунинг ҳисобига водийда 400 миллион куб метр табиий газни иқтисод қилса бўлади. Ҳозирда биноларни иситишга 2-3 баравар кўп энергия сарфланмоқда”, — дейди президент.
Шавкат Мирзиёев бу масалалар бўйича хар бир вилоят қўшимча электр-энергияси ишлаб чиқариш кераклигини айтди. Хусусан:
- Андижон вилояти 500 миллион киловатт соат (кутилаётган танқислик 405 миллион киловатт);
Бу қуёш панеллари ва кичик ФESлар – 85 млн кВт.с, кичик ГЭСлар – 60 млн кВт.с, кўмир когенерацияси – 130 млн кВт.с ва бошқа тадбирлар ҳисобига – 225 млн кВт.с қопланади (125 млн куб м газ иқтисод қилинади).
Шунингдек, қозонхона ва ишлаб чиқаришларни кўмирга ўтказиш, ҳамда қўшимча тадбирлар ҳисобига 152 млн куб метр газ тежалади (жами газ иқтисоди – 277 млн куб м.).
- Фарғон вилояти 650 миллион киловатт соат (кутилаётган танқислик 535 миллион киловатт);
Бу қуёш панеллари ва кичик ФESлар – 132 млн кВт.с, Фарғона иссиқлик электр-станцияси – 250 млн кВт.с, кичик ГЭСлар – 35 млн кВт.с, кўмир когенерацияси – 40 млн кВт.с ва бошқа тадбирлар ҳисобига – 193 млн кВт.с қопланади (163 млн куб м газ иқтисод қилинади).
Шунингдек, қозонхона ва ишлаб чиқаришларни кўмирга ўтказиш, ҳамда қўшимча тадбирлар ҳисобига 347 млн куб метр газ тежалади (жами газ иқтисоди – 510 млн куб м.).
- Наманган вилояти 600 миллион киловатт соат (кутилаётган танқислик 490 миллион киловатт).
Бу 100 МВт ФES ҳисобига – 150 млн кВт.с, қуёш панеллари ва кичик ФESлар – 96 млн кВт.с, кичик ГЭСлар – 75 млн кВт.с, кўмир когенерацияси – 80 млн кВт.с ва бошқа тадбирлар ҳисобига – 199 млн кВт.с қопланади (150 млн куб м газ иқтисод қилинади).
Шунингдек, қозонхона ва ишлаб чиқаришларни кўмирга ўтказиш, ҳамда қўшимча тадбирлар ҳисобига 268 млн куб метр газ тежалади (жами газ иқтисоди – 418 млн куб м.).
“Бу жами 1 750 киловатт соат электр энергия – 388 миллион куб метр газни иқтисод қилади, дегани. Бугунги кунда водийда газ дефицити 1,2 миллиард куб метрни ташкил қилади (Андижонда 162 млн, Фарғонада 650 млн, Наманганда 418 млн куб метр). Ушбу дефицитни қоплаш мақсадида, цемент, оҳак, ғишт заводлари ва иссиқхоналарни тўлиқ кўмирга ўтказиш ҳисобига 586 миллион куб метр табиий газни иқтисод қилса бўлади”, — деди Шавкат Мирзиёев.
Изоҳ (0)