“Ўзтрансгаз” Россиядан газ импортини ошириш мақсадида магистрал газ қувурларини модернизация қилиш дастурини амалга оширади. Бу ҳақда ҳукуматнинг “2024 йил I чорагига мўлжалланган инвестиция дастурини амалга ошириш чора-тадбирлари тўғрисида”ги қарорида кўзда тутилган.
Мазкур дастурни амалга ошириш учун биринчи босқичда 2024—2030 йилларда 500 миллион доллар ажратиш режалаштирилган. Шу орқали табиий газ қабул қилишни кунига 32 миллион куб метргача ошириш кўзда тутилган.
Лойиҳа хорижий кредитлар ҳисобидан молиялаштирилади.
Шунингдек, республика магистрал газ узатиш тизимини модернизация қилиш ва самарадорлигини ошириш дастури (2021—2024 йиллар) ҳам давом эттирилади. Умумий қиймати 483 миллион доллар бўлган лойиҳа 511 километр магистрал газ қувурлари ва 10 та газ насос агрегатини модернизация қилишни кўзда тутади. 1 январь ҳолатига кўра, 50,1 миллион долларлик кредит маблағларидан фойдаланилмаяпти.
Эслатиб ўтамиз, 2023 йил 7 октябрдан Ўзбекистон Қозоғистон ҳудуди орқали “Марказий Осиё — Марказ” газ қувурида Россиядан газ импортини бошлаган эди. UzGasTrade ва “Газпром экспорт” МЧЖ ўртасидаги икки йиллик шартномага кўра, кунига 9 миллион куб метр ёки йилига қарийб 2,8 миллиард куб метр газ етказиб бериш кўзда тутилган.
Изоҳ (0)