Жиноят оламида “қонундаги ўғри — Бахти Ташкентский” мақомини олган Бахтиёр Қудратуллаев ва 36 нафар айбланувчи бўйича суд мажлиси бошланди. Бу ҳақда судда қатнашган “Дарё” журналисти хабар берди.
Жиноят ишлари бўйича Юнусобод туман судида ЖИБ Шайхонтоҳур туман суди раиси Толибжон Обидов бошчилигидаги судлов ҳайъати “кўча” номини олган тўда ишини кўриб чиқишни бошлади.
Дастлабки тергов органининг айблов хулосасига кўра, судланувчилар — Б.Қудратуллаев, Ш.Қурбанов, Б.Зафаров, Ш.Раҳимов, А.Хўжаев, Д.Шарипов, А.Мирзахонов, Ш.Сулаймонқулов, А.Норқулов, С.Ҳотамов, Н.Жуманиязова, Р.Шакуров, Ш.Қудратуллаев, Т.Турмонов, Ф.Вапаев, М.Носирхўжаев, Д.Мўминхўжаев, М.Усмонбоев, М.Шодманов, Б.Худёров, А.Машрафхонов, V.Қурбанов, А.Маҳамадиёров, А.Жўраев, Б.Бакаев, I.Қудратуллаев, А.Алиев, Ж.Солиев, А.Турсунбоев, Б.Нормирзаев, Ф.Камалов, М.Мирзоев, Н.Багадиров, А.Шелёв, М.Қурбанов, О.Исломов ва М.Ибодуллаев Жиноят кодексининг 104, 109, 138, 165, 168, 228, 242, 243, 273, 276 ва 277-моддаларида назарда тутилган жиноятларни содир этганликда айбланмоқда.
Олий суд ахборот хизматининг аниқлаштиришича, 36 нафар судланувчига нисбатан “қамоққа олиш” ва бир нафарига “гаров“ тарзидаги эҳтиёт чораси қўлланилган.
Тасдиқланган айблов хулосасига кўра мазкур жиноят иши доирасида 46 нафар жабрланувчи ва 70 нафар гувоҳ аниқланган, — дейилади масъуллар изоҳида.
Бугун, 3 июнь куни бошланган суд мажлисида дастлаб 37 нафар судланувчининг шахсига аниқлик киритилди. Адвокатлар ва судланувчиларнинг илтимосномалари тингланди. Давлат айбловчиси томонидан жиноий гуруҳ таъзоларига нисбатан эълон қилинган айблов хулосаси ўқиб эшиттирилди.
“Бахти Ташкентский” ўзига нисбатан эълон қилинган барча айбловларни рад этган бўлса, яна бир судланувчи прокурор айбловида ўзига қўйилган айбловларни эшитиб, қўрқиб кетганини айтди.
Суд 5 июнь, соат 10:00 га қадар танаффус эълон қилди.
Эслатиб ўтамиз, 2023 йил 2 декабрь куни Тошкент шаҳрида “Саидазиз медгородок” лақаби билан танилган шахс қўлга олингани маълум бўлди. У атрофига жисмонан бақувват шахсларни тўплаб, қарздорлик ва бошқа муаммоларни қонунни четлаб ўтган ҳолда ҳал қилиб бериш билан шуғулланган. 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олди.
Кўп ўтмай Тошкент шаҳрида профилактик тадбир давомида Салимбой номи билан танилган Салим Абдувалиев ҳам ушланди. 1950 йилда туғилган Абдувалиев Салим Киргизбаевич (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилган. Март охирларида унга 6 йил муддатга озодликдан маҳрум қилиш жазоси тайинлангани маълум бўлди.
Изоҳ (0)