Қашқадарёдаги туғуруқхонада ҳомиладор аёл ўлик чақалоқ туғди. Унинг турмуш ўртоғи бунда шифокорларни айбламоқда

Ижтимоий тармоқларда номаълум фуқаро шифокор аёлни тасвирга олган ҳолда унинг ўз вақтида тиббий ёрдам бермагани сабаб турмуш ўртоғининг ҳомиласи нобуд бўлгани айтилган видеолар тарқалди. Мазкур вазият юзасидан вилоят Соғлиқни сақлаш бошқармаси ахборот хизмати муносабат билдирди.

Аниқланишича, видеотасвирларда Касби туманида яшовчи 2004 йилда туғилган аёл Ҳ.З. ҳақида сўз юритилган.

“Аёл 2022 йил 20 декабрь куни Касби туман тиббиёт бирлашмасига қарашли 9-оилавий поликлиникада ҳомиладорлик ҳисобига олинган. Ҳомиладор ва туққан аёллар индивидуал картасида қайд этилишича, унда клиник ва лаборатория текширувлари ўтказилган. Умумий қон таҳлили бўйича гемоглобин 88 г/л, камқонлик ўрта оғир даражаси, сурункали пиелонефрит билан оғриган. Ушбу касалликлар бўйича фақат уйида даволанган. Ҳомиладорлик вақтида скрининг текширувидан ўтишдан аёлнинг ўзи бош тортган”, — дейилади бошқарма ахборотида.

Қайд этилишича, ҳомиладор аёл 2023 йилнинг 7 июнь куни соат 07:30 да Касби тумани марказий шифохонасининг туғуруқ бўлимига мурожаат қилиб, навбатчи врач акушер-гинеколог Инобат Шомалиева томонидан текширилган.

“Ҳомиладорлик-I, 39 ҳафта, туғуруқ даракчиси, сурункали камқонлик оғир даражаси, сурункали пиелонефрит ташхиси билан бўлимга қабул қилинган. Клиник лаборатория текширувларидан ўтказилган. УТТ хулосаси бўйича: ҳомиладорлик — 39 ҳафта, ҳомила йўлдошининг вақтидан олдин марказдан кўчиши ва ҳомиланинг она қорнида нобуд бўлиши, ретроплацентар гематома ташхиси қўйилган ва керакли муолажалар стандарт асосида қилинган. Вазиятни ҳисобга олиб ҳомиладор аёл қариндошларининг талаби билан ‘Тез тиббий ёрдам’ машинасида шифокор Инобат Шомалиева кузатувида 7 июнь куни соат 16:10 да вилоят перинатал марказига келтирилган”, — дейилади масъулларнинг бу ҳақдаги ахборотида.

Қўшимча қилинишича, вилоят перинатал марказида беморда зудлик билан кесар кесиш операцияси ўтказилган ва ўлик чақалоқ олинган.

“Амалиётдан сўнг даво муолажалари давом эттирилмоқда. Бемор ва унинг яқинлари шифокорларнинг хатти-ҳаракатларидан норози бўлишса, ҳуқуқни муҳофаза қилиш идораларига мурожаат қилишлари мумкин”, — дейди видеотасвирларга муносабат билдирган масъуллар.