Ботир Қодировнинг Зоҳиршоҳ Жўраев билан судлашаётгани сўнгги кунларда кўплаб муҳокамаларга сабаб бўлмоқда. Хонанда “Дарё” мухбири билан суҳбатда илк маротаба Ўзбекистон халқ артисти Шерали Жўраев унинг отаси эканлиги ҳамда Шоҳжаҳон ва Зоҳиршоҳ Жўраевларни судга беришига нима сабаб бўлгани ҳақида сўзлаб берди.
— Бир кун ичида халқ орасида жуда кўп фикрлар юрибди. Шу фикрларга аниқ, тўғри, шаффоф жавоб беришга қарор қилдим. Шерали Жўраев — менинг отам, отам бўлган ва бундан кейин ҳам отам бўлади. Бу нарсани халқимиз, бутун Андижон билади. Андижондан бориб сўрасангиз, ҳамма андижонликлар гапиради бу ҳақда. Бу яширадиган нарса эмас эди. Лекин бунга сабаб бўлгани учун буни яшириб келганман. Отам билан 20 ёшимгача жуда яхши муносабатда бўлганман. Отам мендан хабар олганлар. Мен ўша ота эшигида катта бўлганман. Ёзги таътилларни отамнинг ота ҳовлисида, бобом ва бувим билан ўтказганман. Беш ёшимгача — отам ва онам ажрашгунларича биз бирга яшаганмиз. Отам онамни яхши кўриб қолиб, никоҳдан ўтишганидан кейин мен дунёга келганман. Никоҳли фарзандман, беникоҳ фарзанд эмасман. Шунга аниқлик киритиб қўйишим керак. Бу борада ҳам турли гап-сўзлар бўляпти. Буни отамнинг атрофидаги яқинлари, уларнинг никоҳига гувоҳ бўлганлар буни жуда яхши билишади. 20 ёшимгача отам билан яхши муносабатда эдик, улар менга моддий ёрдам бериб турардилар. Андижонга келганларида доим кўришардик. Отам менга “Болам, ҳаётда баъзи нарсалар бўлади. Сен бунга сабр қилишинг, тушунишинг керак бўлади”, деганлари учун 43 йил бу мавзуни очмадим. Яъни отамнинг сўзларини икки қилгим келмади, — дейди Ботир Қодиров.
Шунингдек, Ботир Қодиров интернет фойдаланувчиларидан отаси ҳақида турли хунук сўзларни ёзмасликларини сўради.
— Мен мухлислардан илтимос қиламан. Отамнинг шаънига нисбатан турли хунук сўзларни айтишни тўхтатинг. Чунки отамни болалигимдан яхши кўрганман ва бундан кейин ҳам яхши кўраман. Уларни муҳокама қилиш менга эмас. Бу оилавий масала бўлгани учун укаларим билан келишиб оламиз, деган умиддаман. Бу нарсани қилмасдан, судга бермасдан юришим ҳам мумкин эди. Лекин укам Шоҳжаҳон сентябрь ойида Instagram саҳифасига “Сен кимдан дунёга келганингни билмайдиган, ўзингдан ҳам шубҳаланадиган, кимни фарзанди эканлигингни билмайдиган” деган маънодаги пости онамнинг шаъни, шахсиятига теггани учун судга беришга қарор қилдим. Онам учун бу ишга киришдим. Ўтиб кетган онамнинг шаънига номақбул гаплар бўлгани, ўзимнинг шаънимга, қадр-қимматимга тўғри келмайдиган гаплар бўлгани учун чидаб тура олмадим. Шундан кейин уларга қонунан исботлаб беришга киришдим. Лекин мен бировнинг отасини тортиб олганим йўқ, ёки бировнинг отасини отам деган жойим йўқ. Ваҳоланки, менинг отамни улар мендан тортиб олишган. Мен улардан олдин дунёга келганман. Отам ва онам ўртасидаги муносабатларни улар ўзлари билади. Биз фарзандлар ота-онамизнинг муносабатларини муҳокама қилишга ҳақли эмасмиз, — дейди Ботир Қодиров.
Ботир Қодиров билан тўлиқ интервьюни қуйида томоша қилишингиз мумкин.
Изоҳ (0)