Бир аёл Instagram’даги жонли эфирда “қишлоқилар одаммас” дея вилоятликларни ҳақоратлагани акс этган видео тарқалди. Тошкент шаҳар судлари “Дарё”га ҳолат юзасидан суд қарорини тақдим этди.
Маълум қилинишича, А.С. 2023 йил октябрида Instagram’да жонли эфир орқали вилоятликлар ҳақида ҳақоратомуз фикр билдирган. Бу бўйича ўтказилган судда аёл айбига қисман иқрорлик билдириб, бир йигит унга ҳақоратли сўзлар билан ёзгани, шу сабабли жаҳли чиқиб, ушбу гапларни унга йўналтириб гапирганини таъкидлаган.
Шунингдек, бу гаплар битта шахсга нисбатан айтилганини, бу ҳолат юзасидан халқнинг кўп эътирозлари сабабли тегишли жойда кечирим сўраб тушунтириш берганини айтиб, ўзига енгиллик сўради.
Суд аёл иккинчи гуруҳ ногирони эканини инобатга олиб жазо тайинлаган. Суд қарори билан ҳуқуқбузар аёл Маъмурий жавобгарлик тўғрисидаги кодекснинг 41-моддаси (ҳақорат қилиш) билан айбли деб топилиб, унга БҲМнинг 20 баравари (6,8 миллион сўм) миқдорида жарима жазоси тайинланган.
Изоҳ (0)