Қашқадарё вилоятидаги Шаҳрисабз давлат педагогика институти талабаси Маржона Жўрақулова вилоят ҳокими Муроджон Азимовнинг ёшлар билан мулоқотида ҳокимга таклиф бериб, ёш қизларнинг эрта турмушга чиқишининг олдини олиш ташаббусига ҳисса қўшмоқчилигини айтди. Таклиф Муроджон Азимовга маъқул келди. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.
Талаба қиз — Маржона Жўрақулова эрта турмуш ва қариндошлар ўртасидаги никоҳнинг олдини олиш бўйича ташаббусни илгари сурган.
Ўз устида ишлаётган, бир вақтнинг ўзида таълим олаётган ва молиявий мустақиллигини таъминлаётган иқтидорли хотин-қизлар, институтда таҳсил олаётган қизларни бир жойга тўпласам, сиз бизга битта автобус қилиб берсангиз, хонадонма-хонадон, мактабма-мактаб юриб, эрта турмушнинг зарарли оқибатлари ҳақида тарғибот қилсак. Ҳурматли ота-оналар фарзандингизни ўқитсангиз, қўпол бўлса ҳам у эрсиз қолиб кетмайди. Яхши ўқиган қиз тенгини топади деган маънода биз тарғиботга борсак, — дейди Маржона Жўрақулова вилоят ҳокимига таклиф берар экан.
Талаба қиз энг аввало, вилоятнинг Кўкдала ва Косон туманларига бормоқчилигини айтди.
Нимага айнан шу туманлар десангиз, мен интернетда айнан шу мавзу кўп муҳокама қилинаётганини ўқийман. Тарғиботга ёши катта аёлларни юбориш натижа бермайди, у қиз бу аёлдан ўрнак олмайди. Ўзи қатори қизнинг фикрлашини кўрса, унинг имижи ва молиявий имкониятларини кўрса, у ҳам ўқишга ҳаракат қилади. 14 ёшли қизни унаштириб қўйишгач, унинг фикри хаёли ҳеч қачон ўқишда бўлмайди. У қачон ўша боладан смс келишини, қачон телефон қилишини кутади. Лекин биз улар билан гаплашадиган бўлсак, сен институтда ўқигин, мана мен сенга битта наъмуна, бахтинг ҳам топилади. Хавотир олма деган маънода тарғибот қилсак. Бунинг учун эса сиз бизга ёрдам бериб, автобус ажратиб берсангиз, эртадан ишга киришган бўлардик, — дейди талаба.
Талаба қизнинг таклифи вилоят раҳбарига маъқул келган.
Жуда тўғри айтяпти. Ўзи тенги қизлар билан бориб, мактаб, коллеж ва маҳаллаларга юрса, тенгдошлари тинглайди. Ҳали 18 га ҳам кирмаган қизларимизни унаштириб, уларнинг фикрини бузиб, тўғри ўша унаштирилган қиз фақат йигитидан смс келишини кутиб ўтиради. Китоб ҳам ўқимайди, бошқа иш билан шуғулланмайди. Раҳмат, бизнинг микроавтобусларимиз бор, мен Шаҳрисабзга юбораман, — дейди ташаббусни қўллаб-қувватлаган ҳоким.
Аввалроқ Қашқадарё вилоятида 2009 йилда туғилган, 7-синф ўқувчиси унаштирилаётгани ҳақида видео тарқалганди. Шундан сўнг қизнинг онаси ҳолатга изоҳ берганди. Косон туманидаги 59-мактаб директори ҳам 2023 йилнинг 27 ноябрь куни фарзанди Х.Х.нинг тўй маросимини ўтказгани, видеолавҳадаги жараёнда директорнинг келини Б.Н. ҳозирда умумий ўрта таълим мактаби ўқувчиси эмаслиги маълум бўлганди.
Изоҳ (0)