Ўзбекистонда энг камида 65 нафар боланинг ўлимига сабабчи экани айтилаётган “Док-1 Макс” сиропи бўйича асосий айбдорлардан бири сифатида судланаётган Фармацевтика агентлигининг собиқ раҳбари С.К. гумонланувчиларнинг ҳеч бирида айб йўқлигини айтмоқда. Бу ҳақда у суд мажлисида гапириб ўтди, дея хабар берди “Дарё” журналисти.
Собиқ раҳбар бу ҳақида унга савол берган жабрланувчи, Маҳбуба Усмоновага гапириб берди.
Суд тергови қандай фикрда эканини билмадим-у, мен бу ерда ўтирган судланувчиларни ўша пайтдаги раҳбар сифатида айбдор деб ҳисобламайман. Ҳаммаси ўз ишини қилган. Яъни фармакопиядаги ходим ҳам халқаро стандарт асосида дорини тасдиқлаган. Бу (“Док-1 Макс” сиропининг қайта рўйхатдан ўтиши назарда тутилмоқда) 2012 йилда ҳам шу халқаро стандарт бўйича тасдиқланган. 2017 йилда ҳам худди шундай тасдиқланган. Йўқ, ҳозир сен ва шу ерда ўтирганлар айбдорсан дейилса, унда бу дорини 2012 йилда, 2017 йилда рўйхатдан ўтказганлар ҳам (“Док-1 Макс” сиропи дастлаб Ўзбекистонга 2012 йилда кириб келган) жавоб бериши керак бўлади. 2012 йилда бу дорини тасдиқлаган раҳбар ҳам, ходим ҳам бошқа бўлган. 2017 йилда ҳам худди шундай. Аммо улар ва биз битта халқаро стандарт бўйича дорини тасдиқлаганмиз, — деди бу ҳақда гапирган судланувчи.
Судланувчининг бу гапидан келиб чиқиб савол берган жабрланувчи Маҳбуба Усмонова “Дорида заҳар борлиги кейин аниқланди-ку, нега шуни ўз вақтида текшириб кўрмадиларингиз? Бунчалик лоқайдликка йўл қўйдиларингиз?”, дея савол берди.
.jpg)
Ўзбекистонда йилига мингдан ортиқ дори воситалари давлат рўйхатидан ўтказилади. Шу сабаб мана бу дорини мана бу тартиб бўйича рўйхатдан ўтказасан, дея халқаро стандарт қабул қилинган. Фармакопиянинг халқаро стандартини бизникилар ҳам (Ўзбекистон ҳам дейилмоқда — таҳририят изоҳи) қабул қилишган. Лекин у ердаги хатони оладиган бўлсангиз, бошига, 90 йилларга қайтиб фармакопияни тасдиқлаган, Британияда ўтирган фан докторини бу ёққа олиб келиб қўйиб, нега сен ўша пайтда бундай хато қилгансан, дейишимиз керак бўлади, — деди судланувчи.
Фармацевтика агентлигининг собиқ раҳбарига кўра, у ва унинг судланаётган жамоаси Ўзбекистон фармацевтикасида кўп янгиликларни амалга оширган.
Ўз вақтида давлат раҳбарига кириб, “Ҳурматли президент инспексион текширув тартибини мажбурий қилайлик, чет элликларга ишонмайлик, ўзимиз қилайлик деб”, инспексион текширув тартибини йўлга қўйдик. Шахсан мен ўз ишимга совуққонлик қилдим деб ўйламайман. Нимадир қилолмай қолгандирман, аммо бу ишимга совуққонлик эмас. Шу ерда ўтирган оммавий ахборот воситалари ҳамда жабрланувчиларга айтмоқчиманки, судланаётганлар қасддан шу хатони қилган дейиш хато, — деди судланувчи собиқ раҳбар.
Эслатиб ўтамиз, “Док-1 Макс” суди мажлисларида қатнашиб сўз олган бир нечта судланувчи ва мутахассис гувоҳлар “Док-1 Макс” сиропи қайта рўйхатдан ўтказилаётган пайтда ҳам халқаро стандарт асосида текширувдан ўтказилганини, шу сабаб сироп таркибидаги заҳарли модда аниқланмаганини билдирганди. Уларнинг айтишича, нафақат “Док-1 Макс” таркиби, Ўзбекистонга кириб келаётган бошқа дорилар таркиби ҳам халқаро стандарт асосида текширилса, ундаги заҳарли моддани аниқлаб бўлмайди. Қачонки, қўшимча текширув қилинса, заҳарли дорининг Ўзбекистонга кириб келишига тўсқинлик қилиш мумкин.
Изоҳ (0)