Судьялар олий кенгаши Ботир Қодиров суд иши бўйича томонларни баёнот беришдан тийилишга чақирди.
Маълум қилинишича, фуқаролик ишлари бўйича Учтепа туманлараро судида даъвогар Ботир Қодировнинг Жўраевларга нисбатан “оталик фактини белгилаш”га оид фуқаролик низоси кўриб чиқилмоқда. Фуқаролик низоси таниқли шахслар ўртасида кечаётгани ҳамда марҳум ва машҳур инсон ҳаёти билан боғлиқлиги боис воқеалар ривожи кенг жамоатчилик томонидан катта эътибор билан кузатилаётгани, айни жараёнда иш бўйича тарафларнинг ҳолатига тушуниш билан муносабатда бўлиш мумкин.
Бироқ низо судлашиш даражасига етиб, процессуал жараёнлар давом этаётган бир пайтда тарафлар (ёки уларнинг вакиллари) томонидан оммавий ахборот воситалари ва ижтимоий тармоқлардаги чиқишлари кенг муҳокамаларга сабаб бўлмоқда.
Тармоқлардаги муҳокамаларда ҳали якунига етмаган иш бўйича турли башоратларга берилишлар, суддан аввал “қарор чиқариб қўйиш” ҳолатлари мавжуд , энг ёмони, низо судда холис ва беғараз кўрилишига асоссиз шубҳалар ҳам билдирилмоқда. Буларнинг ҳаммаси судга нисбатан ижтимоий босим пайдо қилаётганига таъкид шарт эмас.
Судьялар олий кенгаши матбуот хизмати, мавжуд вазиятдан келиб чиқиб, иш бўйича тарафларни турли шакл ва кўринишда баёнот беришдан тийилишга, журналист ва блогерларни эса шахсга оид маълумотлар ҳамда суд ишига доир ахборотларни тарқатишдек нозик ва ҳассос масалага масъулият билан ёндашишга чақиради, — дейилади хабарда.
Аввалроқ Хонанда Қодиров Ботир Шералиевич жавобгарлар — Шоҳжаҳон ва Зоҳиршоҳ Жўраевлардан оталикни белгилашни талаб қилиб судга ариза бергани хабар қилинган эди.
Ҳолат юзасидани изоҳ берган Зоҳиршоҳ Жўраев жамоатчиликдан бундай пиар ва ҳайпларга оиласини аралаштирмасликни илтимос қилиб сўраган.
Кейинроқ Ботир Қодиров Шерали Жўраевнинг никоҳли фарзанди эканлиги ҳамда марҳум ҳофизнинг ўғиллари билан нима мақсадда судлашаётгани ҳақида гапирган эди.
Изоҳ (0)