Қашқадарё вилояти ҳокими Муроджон Азимов Қарши шаҳри ҳокимидан 5 миллион сўм моддий ёрдам олиб, яна пул сўраб келган мурожаатчини уялтирди. Унинг сўровини рад этди. “Сен ҳам йигитсан, меҳнат қил”, — деди вилоят ҳокими.
Вилоят ҳокимининг матбуот котиби Аҳрор Содиқовнинг “Дарё”га маълумот беришича, воқеа Муроджон Азимовнинг 25 ноябрь, шанба куни бўлиб ўтган сайёр қабулида содир бўлган.
Муроджон Азимовнинг қабулида бўлган фуқаро “уй-жой қуриш учун маблағ керак”, дейди. Бунга жавобан вилоят ҳокими фуқародан аввалроқ давлатдан ёрдам олган ёки олмагани ҳақида сўрайди.
Ҳоким бува 5 миллион сўм ёрдам қилди. Лекин бу пул етмаяпти-да, — деди вилоят ҳокими сўровига жавоб қайтарган фуқаро.
Вилоят ҳокими сўровига жавобан суҳбатга қўшилган Қарши шаҳри ҳокими Нормўмин Холбоев бир ой аввал кўчада юрганида ушбу фуқарони учратиб қолиб, сўраган ёрдамига жавобан икки нафар тадбиркорни чақириб, фуқарога улардан 5 миллион сўм олиб берганини айтади.
Бирдан икки тадбиркорни чақириб, қўлига 5 миллион сўм нақд пул бериб юбордим, — дейди мурожаатчи ҳақида гапирган Қарши шаҳри ҳокими.
Бу маълумотларни тинглаган вилоят ҳокими Муроджон Азимов мурожаатчи фуқарога энди пул берилмаслигини, ишлайман деса маоши 3,5 миллион сўмдан 4,5 миллион сўмгача бўлган иш топиб беришини айтади.
Оғайни сен ҳам йигитсан, меҳнат қилгин. Ишга жойлаштириб қўяман. 3,5 миллион сўмдан 4,5 миллион сўмгача ойлик беради. Ишлайсанми? Ҳозир буйруғингни чиқартираман. Ногиронмассан, кам таъминланмагансан, ишлайсан, пул оласан, — деди вилоят раҳбари.
Аввалроқ Қарши тумани ҳокими Зоир Алиқулов ҳокимлар қабулида бўлиб, тўрт мучаси соғ бўлса-да, давлатдан бирор нима ундиришга уринаётган боқимандалик кайфиятидаги мурожаатчиларни қоралаганди.
Изоҳ (0)