Қирғизистоннинг Ола-Буқа вилоятида чегарачилар контрабандага ёрдам бергани учун қўлга олинди. Бу ҳақда Миллий хавфсизлик давлат қўмитасига таяниб, 24.kg хабар берди.
Хабарга кўра, 17 декабрдан 18 декабрга ўтар кечаси чегарачилар “Баймак-Автодорожний” назорат-ўтказиш пунктида иш вақтидан ташқари контрабанда юкларини ўтказиб юборишган. Ўша пайтда улар қўлга олинган. Назорат-ўтказиш пунктидан чегарачилар юкларни шу йўл билан мунтазам равишда ўтказган.
“Чегара хизмати ҳарбийлари молиявий мукофот учун тунги вақтда товарлар контрабандасида фаол иштирок этган. Шу тариқа контрабанданинг барқарор канали ташкил этилган ва у фаол ишлаган. Шу билан бирга, улар ўзларининг жиноий ҳаракатларини яшириш мақсадида назорат-ўтказиш пунктидаги видеокузатув камералари ёзиб олишига йўл қўймаслик учун режимдаги объектнинг бутун ҳудудида электр таъминотини узиб қўйган”, — дейилади хабарда.
Бундан ташқари, мазкур чегарачилар назорат-ўтказиш пунктини четлаб ўтиб, ўтиш жойи орқали ноқонуний миграция каналини ташкил қилган.
“Баймак-Автодорожний” назорат-ўтказиш пунктининг саккиз нафар ҳарбий хизматчиси ва контрабанда билан шуғулланган беш нафар фуқаро қўлга олинди. Ҳозирда тергов ҳаракатлари олиб борилмоқда, — деди Миллий хавфсизлик давлат қўмитаси ва қўлга олиш Чегара хизмати раҳбарияти кўмагида амалга оширилганини қўшимча қилди.
Изоҳ (0)