Қашқадарё вилоятининг Қарши шаҳри ва Ғузор туманларида ноқонуний тамаки ва алкоголь маҳсулотлари савдоси билан шуғулланиб келган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Қарши шаҳридаги “Хонтепа” МФЙда ноқонуний равишда тамаки маҳсулотлари савдоси билан шуғулланиб келган И.Н. “Л.Э.” МЧЖга қарашли савдо дўконида турли номдаги жами 2 052 қути, умумий баҳоси 70 млн сўмлик тамаки маҳсулотларини сотиш мақсадида сақлаб келаётгани аниқланиб, ушбу тамаки маҳсулотлари ашёвий далил сифатида олинган.
Шунингдек, Ғузор туманидаги “Хўжагузар” МФЙда фуқаро О.С. ноқонуний алкоголь ва тамаки маҳсулотлари савдоси билан шуғулланиб келаётгани аниқланиб, 42 турдаги 1030 дона истеъмолга яроқсиз алкоголь ва 16 турдаги 1804 қути тамаки маҳсулотлари ашёвий далил сифатида олинган.
Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)