Гарри Поттер ҳақидаги фильмларда бош қаҳрамон образи билан танилган Дэниел Рэдклифф 23 июль куни 35 ёшга тўлди. Актёр болалигиданоқ фильмларда роль ўйнашни бошлаган. Бугунги кунда у Буюк Британиядаги энг кўп маош олувчи актёрлардан бири ҳисобланади.
Биографияси
Дэниел Рэдклифф 1989 йил 23 июлда Лондонда туғилган. Унинг отаси Алан Жорж Рэдклифф адабий агент, онаси Марсия Жанин Грешам Жейкобсон эса кастинг агенти бўлиб ишлаган. Дэниелнинг ўзи оиласи ҳақида шундай дейди: “Менинг жуда аҳил оилам бор. Оилам — менинг жамоам. Биз бирга ишлаймиз, баъзида оиламни қабила деб ҳам атайман. Мен оилам олдидан қарздорман”.
Карьерасининг бошланиши
10 ёшида Дэниел “Дэвид Копперфильд” телефильмида экрандаги дебютини қилади. У ташқи ҳаётидан кўра ички дунёси анча қизиқроқ бўлган жуда эҳтиёткор бола ролини ўйнайди. Бу унинг биринчи жиддий роль бўлиб, шундан сўнг актёрлик фаолияти бошланади.
Ўша йили Рэдклифф 2001 йилда премьераси бўлган Крис Коламбуснинг “Гарри Поттер ва ҳикматлар тоши” фильмидаги Гарри Поттер роли учун кастингдан муваффақиятли ўтади. Фильм жуда омадли чиқади ва ёш актёрга катта шуҳрат келтиради. Кўп сонли суратга олишлар туфайли Дэниел мактабни тарк этишга мажбур бўлади. Бироқ актёр бундан афсусланмайди.
“Мактаб мен учун доим зерикарли жой бўлган. Шунинг учун коллежда ҳам ўқишни хоҳламаганман”, дейди Рэдклифф.
2004 йилда Рэдклифф “Мен ёзган пьеса” мусиқий комедиясида театрдаги дебютини қилади. Актёр 2007 йилдан 2009 йилгача “Эквус” спектаклида ва “Ҳеч нарса қилмай, қандай қилиб бизнесда муваффақиятга эришиш мумкин” (2011) мусиқий фильмида роллар ижро этган.
“17 ёшли болага Энтони Ҳопкинс ва Ричард Бёртон каби буюк актёрлар роль ўйнаган Лондондаги энг яхши театрлардан бирининг саҳнасида култ спектаклда роль таклиф қилинганда бундай ажойиб имкониятдан воз кечиш шунчаки аҳмоқлик бўларди. Мен абадий “болалар юлдузи” бўлиб қолиш ниятида эмасман”, дейди актёр.
“Гарри Поттер”даги иши билан бир қаторда, актёр бошқа лойиҳаларда ҳам роль ўйнайди. У “Декабрист йигитлар ва “Менинг ўғлим Жек” фильмларида иштирок этади. Рэдклифф томошабинларга ўзини турли томонлардан кўрсатишни ва “битта рол” асири бўлиб қолмасликни хоҳлайди.
Гарри Поттердан кейинги карьераси
“Гарри Поттер” тугагандан сўнг, Дэниел Рэдклифф актёрлик фаолиятини давом эттиради, ҳатто муаллифлик фильмларини суратга олишни бошлайди. У томошабинларга кўпроқ нарсага қодир эканлигини кўрсатмоқчи эди. Ёш сеҳргар ҳақидаги сўнгги иккита фильм — “Ажал туҳфаси” чиққанидан кейинги 10 йил ичида Рэдклифф асосан муаллифлик лойиҳаларда бир нечта унутилмас ролларни ўйнайди.
2013 йилдан 2015 йилгача Рэдклифф алкоголизм билан курашганига қарамай, ишлашда давом этади. Дэниел ўзини турли жанрларда синаб кўради: “Шохлар” фантастик триллери, “Виктор Франкенштейн” тарихий-фантастик фильми, “Мутлақ қудрат” драмаси, аммо бу фильмларнинг барчаси эътибордан четда қолди. Ушбу ролларнинг ҳеч бирида актёр мақтовга сазовор бўлмаган.
2020 йилда Дэниел Рэдклифф “Преториядан қочиш” фильмида қамоқдан қочишга тайёрланаётган маҳбус ролини ўйнайди. Рэдклифф ўйнаган Тим Женкин ўзининг шафқатсиз табиатига қарамай, ўз режасини охиригача амалга оширишга тайёр бўлган иродали йигит бўлиб чиқди.
Ҳозирда актёр параллел равишда учта лойиҳа суратга олмоқда. Унинг сўзларига кўра, шу йиллар давомида у ўзини серқирра актёр сифатида кўрсата олган. У драма, комедия, илмий фантастика ва бошқа кўплаб жанрларда маҳорат билан роль ижро этди. Бундан ташқари, Дэниел театр саҳнасида ҳам фаол роль ўйнайди.
Изоҳ (0)