Наманган вилояти Поп туманида акциз маркасиз тамаки маҳсулотлари тўхтатиб қолинди, деб хабар беради Бош прокуратура ҳузуридаги департамент.
Маълум қилинишича, департаментнинг Поп туман бўлими томонидан туман ИИБ ва солиқ инспекцияси ходимлари билан ҳамкорликда “Наманган мунтазам” ЙПХ масканида тезкор тадбир ўтказилган. Тадбирда фуқаролар И.А. ва О.О. ўзаро тил бириктириб, О.О.нинг Isuzu русумли автотранспорт воситасида умумий баҳоси 477 миллион сўмлик 4 хил турдаги жами 49 480 қути акциз маркасиз тамаки маҳсулотларини Тошкент шаҳрига сотиш мақсадида олиб кетаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Хоразмда 422 миллион сўмлик акциз маркасиз тамаки маҳсулотлари аниқлангани, Навоий ва Бухорода 600 млн сўмлик қалбаки акциз маркали алкогол маҳсулотлари савдосининг олди олингани тўғрисида хабар берилганди.
Изоҳ (0)