“Ховренко” номидаги Самарқанд вино комбинатида қалбаки акциз маркали алкогол маҳсулотлари ишлаб чиқарилаётгани аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Самарқанд вилоят бошқармаси ва ИИБ ЖҚБ ходимлари ҳамкорлигида тезкор тадбир ўтказилган. Тадбирда Самарқанд тумани “Қозиариқ” маҳалласидаги хонадонлардан бирида яшовчи З.У. ўз уйи омборхонасида қалбаки акциз маркалар билан елимланган 25 минг дона “Водка Русская премиум” номли ароғини, 9 минг дона “Самарқанд” конягини, 8 760 дона “Портвейн 53” номли виносини ҳамда 468 дона “Старий Самарканд” номли конягини сотиш мақсадида сақлаб келаётгани аниқланган.
Ушбу қалбаки акциз маркали маҳсулотларнинг келиб чиқиш манбасини аниқлаш мақсадида давом этган тадбирда, фуқаро З.У.га алкоголли маҳсулотларни “Ховренко” номидаги Самарқанд вино комбинати АЖнинг директори ўринбосари А.О. етказиб бергани маълум бўлган.
Комбинат омборхонаси кўздан кечирилганда ушбу омборхонадан қалбаки акциз маркали 8 940 дона “Портвейн 53” виноси, 5 минг дона қопқоқ, 9 минг дона ёрлиқ ва 20 150 дона алкогол шиша идишлари мавжудлиги аниқланиб, тадбир якунида жами 631,7 миллион сўмлик товар моддий бойликлар ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкогол маҳсулотларини муомалага киритилишининг олди олингани тўғрисида хабар берилганди.
Изоҳ (0)