Британиялик ёзувчи Жоан Роулингнинг асари асосида суратга олинган «Гарри Поттер» фильмида Драко Малфой ролини ўйнаган актёр Том Фелтон ўзининг «Сеҳрли таёқча ортида: жоду ва тартибсизликда ўсган сеҳргар» («Beyond the Wand: The Magic and Mayhem of Growing Up Wizard») номли хотира китобида режиссёр Крис Коламбус Дэниэл Редклифф ва Руперт Гринт суратга олиш майдончасида ўзини ёмон тутгани учун жаримага тортилгани ҳақида гапирди.
Америкалик режиссёр Крис Коламбус «Гарри Поттер»нинг биринчи иккита фильмига — 2001 йилда суратга олинган «Гарри Поттер ва ҳикматлар тоши», 2002 йилда намойиш этилган «Гарри Поттер ва махфий ҳужра» фильмларига режиссёрлик қилган. Фелтоннинг сўзларига кўра, Коламбус актёр болаларни назорат қилиш тизимини ишлаб чиққан. «Ҳар сафар кимдир дублни бузса, унга қизил карточка кўрсатишарди. У сумкасига 10 фунт солиш кераклигини айтарди. Суратга олиш жараёнларининг охирида барча пуллар хайрия ишларига сарф қилинди», — дейди актёр.
Фелтоннинг сўзларига кўра, бу «яхши режа» эди, бироқ у ҳар доим ҳам иш бермаган. Айниқса, Рон Уизли ролини ижро этган актёр Руперт Гринтни бошқариш қийин бўлган. «Ўйлашимча, у фильмнинг иккита қисмида 2 800 доллардан кўпроқ пул тўлаган – у бўлар-бўлмасга кулаверарди», — дея қўшимча қилди Фелтон.
Мавзуга доир:
Изоҳ (0)