Британиялик кино ва театр актёри Дэниэл Редклифф “Гарри Поттер” франшизасининг дастлабки учта қисмини суратга олиш вақтида Северус Снейп ролини ижро этган актёр Алан Рикмандан жуда қўрққани ҳақида Happy Sad Confused подкастида сўзлаб берди.
Шунингдек, актёр болалигида ҳамкасби ундан қаттиқ нафратланишига амин эди.
Алан Рикман мени роли ва овози билан жуда қўрқитар эди. Унинг овоз тембри шунчалик паст эдики, айтган сўзлари ичимда акс-садо бергандек бўларди, — дейди Даниэль.
Подкаст бошловчиси Редклиффга Алан Рикманнинг ўлимидан бир оз аввал ёзиб олинган интервьюсидан парча кўрсатди. Унда марҳум актёр ёш ҳамкасблари ҳақида илиқ фикрлар билдирган эди. Рикманнинг қайд этишича, у Дэниэлнинг Бродвейда муваффақият қозонгани учун ёш ҳамкасбидан мағрурланган:
Мен Нью-Йоркдаги кафелардан бирида Дэниэл билан учрашишга муваффақ бўлдим. У ҳам театрда ўйнаш учун шаҳарга келган эди. “Ҳеч нарса бажармай қандай қилиб бизнесда муваффақиятга эришиш мумкин” номли мюзиклда Дэниэл ажойиб рол ижро этди. Айтиш жоизки, ҳамкасбим нью-йорклик мутахассислардан яхшироқ рақсга тушди. Демак, у ўз устида жуда кўп ишлаган, — деган эди Рикман.
Алан Рикман умрининг сўнгги кунларига қадар ҳамкасби иштирок этган спектаклларни доимий томоша қилиб борган ва Дэниэл билан саҳналарни тез-тез муҳокама қилиб турган.
Эслатиб ўтамиз, актёр Алан Рикман 69 ёшида саратон хасталигидан вафот этди. Рикманнинг “Чақилмас ёнғоқ” фильмидаги террорчи Ҳанс Грубер, “Робин Гуд: қароқчилар шаҳзодаси” фильмидаги Ноттингем шерифи роллари анча машҳур. Ёш авлод вакиллари Алан Рикманни асосан “Гарри Поттер” франшизасидаги Северус Снейп роли орқали танийди.
Изоҳ (0)