«Гарри Поттер» фильмидаги Ҳагрид роли орқали дунё бўйлаб мухлисларни топган актёр Робби Колтрейн 14 октябрь куни 72 ёшида вафот этди. Бу хабарни нафақат томошабинлар, балки «Гарри Поттер» фильмида у билан суратга тушган актёр ва актрисалар чуқур қайғу билан қарши олди. Ушбу фильм сабаб Робби Колтрейн билан яқин инсонларга айланган машҳурлар актёр билан боғлиқ хотираларини мухлислари билан бўлишди.
«Гарри Поттер» асари муаллифи — Жоан Роулинг
«Мен Роббига ўхшаган инсонни ҳеч қачон учратмаганман. У ажойиб истеъдод эгаси ва бутунлай бошқача инсон эди. Мен уни, унинг ишини билиш ва у билан бирга кулиш бахтига муяссар бўлдим», — дейди ёзувчи.
Гарри Поттер — Дениел Редклифф
«Робби мен учратган энг ҳазилкаш инсонлардан бири эди ва болалигимизда суратга олиш майдончасида бизни доим кулдирарди. Айниқса «Гарри Поттер ва Азкабан маҳбуси» фильмини суратга олиш чоғида Ҳагриднинг кулбасида ёмғирдан узоқ вақт беркиниб турганимизда кайфиятимизни қандай кўтарганини, кайфиятимизни кўтариш учун ҳикоя ва ҳазиллар айтиб берганини эслайман. Мен у билан учрашиш ва у билан ишлаш бахтига муяссар бўлдим, унинг энди орамизда йўқлиги мен учун қайғули ҳолат. У жуда маҳоратли актёр ва ажойиб инсон эди», — деб ёзади Дениел Редклифф.
Гермиона — Эмма Уотсон
«Унинг истеъдоди шу қадар улкан эдики, улкан инсон ролини ўйнаганида ҳам маъно бор — у ўзининг ёрқинлиги билан ҳар қандай бўшлиқни тўлдира олар эди. Робби, қачондир мен ҳам суратга олиш майдончасида менга меҳрибон бўлганингиз каби меҳрибон бўламан, ваъда бераман, буни сизнинг хотирангизга атаб қиламан. Билингки, мен сизни жуда яхши кўраман ва ҳурмат қиламан. Сизнинг меҳрибончилингизни, тахаллусларингизни, илиқлигингизни, кулгиларингизни ва қучоқлашингизни жуда соғинаман. Сиз бизни бир оила қилдингиз. Билингки, сиз биз учун шундай бўлгансиз. Ҳагриддан яхшироғи бўлмаган,» — деб хотиралари билан бўлишди актриса Эмма Уотсон.
Рон Уизли — Руперт Гринт
«Мен сигара ва соқол елимининг ҳидини ҳеч қачон унутмайман — бу ажойиб комбинация. Дунёда бошқа ҳеч ким Ҳагридни ўйнай олмади. Фақат Робби. У худди китоблар ва фильмлардаги каби эди: илиқ, раҳмдил ва қувноқ. Ўнлаб йиллар ўтиб ҳам бизга ғамхўрлик қилишда давом этган улкан юракли одам», — деб ёзди Руперт Гринт Instagram’даги саҳифасида.
Жеймс Фелпс — Фред Уизли
«Қуёш остида ҳар қандай мавзудаги тасодифий суҳбатларни соғинаман. 2000 йилнинг сентябрини ҳеч қачон унутмайман, Робби Колтрейн 14 ёшимда мени ташвишга солаётган суратга олиш майдончасидаги биринчи кунимда ёнимга келиб: ‘Бу ишдан роҳатланинг, шунда ҳаммаси жойида бўлади’,— деди. Бунинг учун унга раҳмат», — дейди актёр.
«Гарри Поттер» фильмининг бошқа актёрлари ҳам Робби Колтрейн каби инсонлар Ерда минг йилда бир марта туғилишини таъкидлаб, қайғуда эканини айтишди. Шунингдек, актёрнинг кўплаб ҳамкасблари у билан боғлиқ хотиралари ҳақида мухлисларига гапирди.
Мавзуга доир:
- «Гарри Поттер» фильмидаги Ҳагрид роли билан танилган актёр Робби Колтрейн вафот этди.
- Саратон, битлаш, қовурға синиши. «Гарри Поттер» фильмининг актёр ва актрисалари суратга олиш майдончасида дуч келган қийинчиликлар.
- Гарри Поттер — Дэниэл Редклифф актёрликни тарк этиб, режиссёрликда ўзини синаб кўрмоқчи.
- Фақат Эмма Уотсон, Дэниэл Редклифф ёки Руперт Гринт эмас: «Гарри Поттер»даги актёр болалар қанчалик ўзгарган?
Изоҳ (0)