Нью-Йоркдаги метрода жанжал отишмага айланиб кетди (видео) 

Нью-Йорк метросининг гавжум бекатида икки эркак ўртасидаги жанжал натижасида отишма содир бўлди. Бу ҳақда ABC News хабар берди.

Ҳодиса 32 ёшли эркакнинг Ностранд проспектидаги поездга ўтиргани ва унга 36 ёшли эркакнинг “тажовузкор ва провокацион ҳаракат” билан яқинлашганидан сўнг бошланган, — деди Нью-Йорк полициясининг транзит бўлими бошлиғи Майкл М. Кемпер.

Эркаклар ўртасида тортишув жисмоний жанжалга айланган. 36 ёшли эркак ўткир буюмни кўрсатиб, кейин эса уни ерга қўйган. Жанжал давом этгач, тажовузкор эркак палтосидан қурол олиб, таҳдидли тарзда иккинчисига яқинлашган. 32 ёшли шахс жанжални давом эттириб, 36 ёшли эркакдан қуролни олиб, унга қарата бир неча марта ўқ узган. 

Ҳодиса оқибатида бошқа ҳеч ким жабрланмаган. Поезд келган станцияда бир нечта полициячи бўлган ва воқеа жойига етиб келган. Полиция гувоҳлар билан суҳбатлашиш ҳамда қўшимча далиллар тўплаш учун станцияда қолган. Ҳозирда тергов давом этмоқда.

Полиция ўқ еган 36 ёшли эркакнинг аҳволи оғир эканини билдирган. Ўқ отган 32 ёшли шахс қўлга олинган.