Ўзбекистон Марказий банки жорий йилнинг февраль ойида 12 тонна олтин сотиб, бу даврда қиммат металл сотуви бўйича дунёда биринчи ўринга чиқди. Бу ҳақда World Gold Council ҳисоботида маълум бўлди.
Ҳисоботга кўра, февраль ойида марказий банклар томонидан сотиб олинган олтиннинг умумий ҳажми 19 тоннани ташкил этган, бу март ойига нисбатан 58 фоизга кам. Иккинчи ўринни Иордания Марказий банки (4 тонна олтин сотган) эгалламоқда.
Қимматбаҳо металларни харид қилиш бўйича энг катта кўрсаткич Хитой Халқ банки (12 тонна), шунингдек, Қозоғистон Миллий банкига тўғри келмоқда. Бундан ташқари, Туркия Марказий банки олтин захираларини 4 тоннага оширган.
Февраль ойида марказий банклар томонидан талаб секинлашганига қарамай, олтин сотиб олишнинг кенг тенденцияси сақланиб қолмоқда.
Аввалроқ Статистика агентлиги февралдаги олтин сотуви республиканинг январь-февраль ойларидаги жами экспортидан 36,3 фоизини ташкил этганини маълум қилганди. Республика 2023 йил январда 1,2 миллиард долларлик олтин экспорт қилган. Жорий йил январда эса олтин сотилмаган.
Йиллик рақамларга қаралса, 2023 йилда Ўзбекистоннинг жами экспорти ҳажми 24,4 миллиард долларни ташкил этганди. Шундан 33,4 фоизи, яъни 8,1 миллиард доллари олтин экспорти ҳиссасига тўғри келган.
Ўзбекистон ўтган йили олтин сотиш бўйича дунёда иккинчи ўринни эгаллаганди. Мамлакат йил давомида қарийб 25 тоннадан ортиқ олтин сотган.
Изоҳ (0)