Италия Ички ишлар вазирлиги Москва яқинидаги Crocus City Hall концерт залида содир этилган терактдан сўнг терроризмга қарши кураш чораларини кучайтиришга қарор қилди. Бу ҳақда EFE агентлиги маълум қилди.
Тегишли қарор Миллий хавфсизлик қўмитаси йиғилишида қабул қилинди. Ушбу чора-тадбирлар, хусусан, католикларнинг Пасха байрамларида хавфсизликни янада самаралироқ таъминлаш имконини бериши кутилмоқда.
“Учрашув иштирокчилари Москва яқинида содир бўлган терактни синчковлик билан таҳлил қилишди. Бу таҳлил террорчилардан ҳимояланиш бўйича илгари киритилган чора-тадбирларни такомиллаштириш учун зарур эди”, — дея таъкидлади Италия ИИВ.
Италия ташқи ишлар вазири Антонио Тажани ҳукумат ўз ватандошларини террорчилик таҳдидидан янада самаралироқ ҳимоя қилишга интилаётганини таъкидлади.
“Биз дунёда нима бўлаётганини диққат билан кузатиб борамиз ва италияликларни имкон қадар ҳимоя қилишга ҳаракат қиламиз”, — деди Тажани маҳаллий радиода.
Изоҳ (0)