Россия Ташқи ишлар вазирлиги Украина ҳукуматини расман Crocus City Hall’даги терактда айблади. Украина разведкаси мазкур айбловларга жавоб қайтарди. Бу ҳақда BBC хабар берди.
Россия айблов юзасидан Украинани терактда иштирок этган шахсларни зудлик билан экстрадиция қилиш, жабрланганларга етказилган зарарни қоплашга чақирди.
Бундай терактлар қаторида вазирлик Дарья Дугина ва Владлен Татарскийнинг ўлдирилиши, Захар Прилепинга суиқасд уюштирилгани, Қрим кўпригининг портлатилиши, шунингдек, Россия кўнгиллилар корпусининг (Россия террорчи ташкилот сифатида тан олинган) хатти-ҳаракатларини санаб ўтди.
Ташқи ишлар вазирлиги баёнотида, бу воқеаларнинг барчаси Crocus City Hall’га қилинган ҳужум билан боғланган.
Россия ваколатли органлари томонидан ўтказилган тергов ҳаракатлари ушбу жиноятларнинг излари Украинага олиб боришидан далолат беради, — дейилади баёнотда.
Вазирлик ҳеч қандай тафсилот ва далил келтирмаган, бироқ Украина Хавфсизлик хизмати раҳбари Василий Малюкни ҳибсга олишни талаб қилган.
Украина хавфсизлик хизмати Россия Ташқи ишлар вазирлиги баёноти Бучада содир этилган ваҳшийликлар фонида бемаъни кўринишини айтди.
Россия Ташқи ишлар вазирлигининг ҳар қандай сўзлари аҳамиятсиз. Россия ҳақиқатан ҳам эътиборга лойиқ фақат битта баёнот бериши мумкин, яъни урушда мағлубиятга учрагани ва Украина тупроғидан оккупацион қўшинларини олиб чиқиши ҳақида бутун дунёга эълон қилиш, — дейилади хавфсизлик хизмати муносабатида.
Украина терактга алоқадорлигини расман рад этади. Ўз навбатида, ИШИДнинг Афғонистондаги бўлими “Вилояти Хуросон” ушбу ҳужум учун жавобгарликни ўз зиммасига олишини бир неча бор таъкидлаган.
Ғарб давлатлари, жумладан АҚШ, Буюк Британия ва Германия бошиданоқ Украинанинг Crocus’даги терактга ҳеч қандай алоқаси йўқлигини таъкидлаганди.
Изоҳ (0)