“Бири турмуш ўртоғи билан келса, бошқаси ўғли билан, яна бири эса набираси ёнида”. Ўзбекистондаги шаҳар, туман ҳокимларининг сайловдаги фаоллиги қай даражада бўлди?

Бугун Ўзбекистондаги энг катта сиёсий жараёнлардан бири — муддатидан аввалги президентлик сайлови бўлиб ўтди. Мазкур жараёнда ўзбекистонлик аҳолининг фаоллиги анча ортган бўлса, амалдорлар иштироки ҳам етарли даражада бўлди, десак хато қилмаган бўламиз. Хўш, ҳудудлардаги туман ва шаҳар ҳокимлари қанчалик аҳолига намуна бўла олди? “Дарё” мазкур саволларга жавоб топиш илинжида ҳокимликларнинг ахборот хизмати вакиллари билан боғланиб, шаҳар, туман раҳбарларининг президентлик сайловидаги иштирокини тасдиқловчи фотосуратлардан сўради.

“Дарё” сўровига жавоб берган Тошкент вилоятидаги мавжуд туман ва шаҳар ҳокимликларидан Чирчиқ шаҳри, Янгийўл, Юқори Чирчиқ, Пискент, Бўка ва Бекобод тумани ҳокимликларининг ахборот хизматлари ҳудуд раҳбарларининг сайловда иштирокини исботловчи суратларни тақдим қилди.

Юқори Чирчиқ тумани ҳокими Ускенбай Атемов президентлик сайловида турмуш ўртоғи, ўғли, келини ва набиралари билан бирга иштирок этган бўлса, Бўка тумани ҳокими Низомиддин Аббосов ўғли билан кўриниш берди. Чирчиқ шаҳри ҳокими Даврон Ҳидоятов ҳамда Бекобод тумани ҳокими Фурқат Худойбердиевлар сайлов участкасига бир ўзи келиб, фуқаро сифатидаги хоҳиш-иродасини намоён этди. Янгийўл тумани ҳокими Улуғбек Ялгашев, Пискент тумани ҳокими Нодирбек Якубовлар эса сайловда оилавий кўриниш бериб, фуқаролик бурчини бажарган.

“Дарё” мухбири Умиджон Мамарасуловнинг аниқлаштиришича, Андижон вилоятида эса саккиз нафар ҳоким сайловда фаол иштирок этиб, ўзи раҳбарлик қилаётган ҳудуддаги аҳолига намуна бўла олган.

“Дарё” мухбири кузатувларига кўра, сайловдаги фаоллик борасида Қашқадарё вилоятида фаолият юритувчи ҳокимлар анча илғор.

Жумладан, Қарши шаҳри ҳокими Нормўмин Холбоев, Қарши тумани ҳокими Беҳзод Юсупов, Қамаши тумани ҳокими Ботир Тоғаев, Китоб тумани ҳокими Ўктам Пардаев, Кўкдала тумани ҳокими Хуррам Жўраев, Чироқчи тумани ҳокими Нодир Эркаев, Ғузор тумани ҳокими Бекзод Суюнов, Миришкор тумани ҳокими Шерали Санаев, Нишон тумани ҳокими Мухтор Ҳайитмуродов якка бўлса-да, кўриниш бериб, сиёсий фаоллик борасида тумандошларига ўрнак бўлган.

Деҳқонобод тумани ҳокими Зоир Алиқулов, Муборак тумани ҳокими Акром Арипов, Касби тумани ҳокими Тўхтамурод Мейлиевлар сайловда оилавий иштирок этиб, нафақат ўзи, оиласи ҳам ўзи каби фаол эканини намоён қилган. Ва президентлик сайловида ўз хоҳиш-иродасини билдирган.