Тошкент шаҳрида жойлашган Абу Сахий бозори яқинида ҳаракатланган автобусда ёнғин чиқди, деб хабар беради ФВВ матбуот хизмати.
Қайд этилишича, 10 июль куни соат 06:51 да Чилонзор тумани “Бешқўрғон” МФЙ, ТХАЙ кўчасида 147-сонли “Чорсу бозори ва Чинни бозор” йўналишида ҳаракатланган Mercedes-Benz русумли автобуснинг матор қисмида ёнғин юзага келган.
Шунга кўра 1 та ёнғин-қутқарув экипажи ёнғин жойига соат 07:00 да етиб борган. Ёнғин, экипаж боргунга қадар бозор ҳудудий ёнғин ўчириш экипажи ва бирламчи ёнғин ўчириш воситалари ёрдамида ўчирилган. Ёнғин тахминан электр симларидаги қисқа туташув натижасида содир бўлган. Ҳодиса оқибатида тан жароҳати олган ва ҳалок бўлганлар йўқ.
“Тошшаҳартрансхизмат”нинг маълум қилишича, ёнғин автобус ҳайдовчиси Ғ.У. томонидан дарҳол аниқланиб, автобус ичида бўлган йўловчилар зудлик билан автобусдан туширилган ва ушбу ҳолат тезкорлик билан бартараф этилган.
“Ҳозирда ушбу автобус, шатакка олувчи махсус транспорт воситаси ёрдамида ъ18-Автобус саройиъ филиалига олиб келинган бўлиб, техник ходимлар томонидан автобуснинг техник носозлиги бартараф этилиб тез кунларда йўналишга чиқариш чоралари кўрилаётганини маълум қиламиз”, — дейилади хабарда.
Пойтахт автобусларининг ёниб кетиши
Январь охирларида Яккасарой тумани “Қушбеги” МФЙ Шота Руставели кўчасида ҳаракатланиб кетаётган Mercedes-Benz йўловчи ташишга мўлжалланган автобусда ёнғин содир бўлганди. Шунингдек, апрель ойида ҳам Тошкент шаҳри Яккасарой туманида йўловчи автобусида ёнғин юзага келган.
Тошкент шаҳрида 21 май куни Mercedes-Benz русумли 96-сонли йўловчи автобуси тўлиқ ёниб кетган эди.
Изоҳ (0)