“Адолат”, ХДП ва Экологик партиядан президентликка номзодлар сайловда овоз берди (фото)

“Адолат”, Экологик партия ва Халқ демократик партиясидан Ўзбекистон президентлигига номзодлар 9 июль куни сайловда овоз берди.

“Адолат” социал-демократик партиясидан президентликка номзод Робахон Маҳмудова 21-сайлов участкасига оилавий ташриф буюриб, овоз бериш жараёнида иштирок этди.

Экологик партиядан президентликка номзод Абдушукур Ҳамзаев Тошкентнинг Янгиҳаёт туманидаги 583-сайлов участкасига рафиқаси билан ташриф буюриб, овоз берди.

Халқ демократик партиясидан президентликка номзод Улуғбек Иноятов Тошкентнинг Шайхонтоҳур туманидаги 299-умумий ўрта таълим мактаби ҳудудида жойлашган 427-сайлов участкасига рафиқаси билан бирга ташриф буюриб, овоз берди.

Маълумот учун, тўрт нафар номзод президентлик учун курашмоқда. Улар — Халқ демократик партиясидан Улуғбек Иноятов, ЎзЛиДеПдан Шавкат Мирзиёев, “Адолат” партиясидан Робахон Маҳмудова ҳамда Экопартиядан Абдушукур Ҳамзаев.

Сайловда ғолиб бўлган номзод президентликка 7 йилга сайланади. Бу ҳақда янгиланган Конституцияда белгилаб қўйилган.

Марказий сайлов комиссияси ахборотига кўра, 2023 йил 1 июль ҳолатига жами 376 минг 623 нафар сайловчилар муддатидан олдин овоз бериш ҳуқуқидан фойдаланган. Шундан республика ҳудудида — 275 минг 592 нафар, хорижда — 101 минг 31 нафар сайловчи овоз берган.