Бокс бўйича ЖЧ—2023. Абдумалик Ҳалоков муддатидан аввал ғалаба қозонди, Руслан Абдуллаев ва Саиджамшид Жаъфаров эса рақибларини енгиб, финалга йўл олди

Тошкент мезбонлигида ўтаётган бокс бўйича Жаҳон чемпионатининг ярим финалидан ўрин олган жанглар 12 май, жума куни бўлиб ўтмоқда. 

-57 кг вазн тоифасида Абдумалик Ҳалоков қирғизистонлик Мунарбек Сеитбек Уулуга қарши рингга чиқиб, биринчи раунддаёқ техник нокаут эвазига ғалаба қозонди. 

Ҳалоков аввалги босқичларда гаяналик Кевин Аликок, австралиялик Чарли Сениор ва иорданиялик Ишиш Юсуфни енгганди.

-63,5 кг вазн тоифасида Руслан Абдуллаев Хованец Бачковга (Арманистон) қарши жанг қилди ва 5:0 ҳисобида ғалаба қозонди. 

Абдуллаев бунга қадар испаниялик Оер Ибаррече, Пуэрто-Рико вакили Мануэл Фебус, маврикийлик Ричанро Колин ва франциялик Лоунес Хамраоуини мағлубиятга учратганди. 

-71 кг вазнда Саиджамшид Жаъфаров бразилиялик Вандерсон Де Оливейрани 4:1 ҳисобида мағлуб этди ва финалга чиқди. 

Саиджамшид аввалги босқичларда мозамбиклик Осорио Муханга, мексикалик Марко Вердени енгган, нимчорак финалда Пуэро-Рико вакили Габриэль Лланосга қарши жанги эса рақибнинг жароҳати сабаб ўтказилмаганди. Чорак финалда Жаъфаров Россия вакили Игор Свиридченковдан устун келганди. 

Шу тариқа етти нафар ўзбекистонлик боксчи финалда олтин медал учун жанг қилади. Аълохон Абдуллаев (-75) ва Лазизбек Муллажонов (-92 кг) эса бронза медалини қўлга киритди.