Boks bo‘yicha JCH—2023. Oybek Jo‘rayev va Asadxo‘ja Mo‘ydinxo‘jayev finalga yo‘l oldi, A’loxon Abdullayev esa bronza medali sohibiga aylandi

Toshkent mezbonligida o‘tayotgan boks bo‘yicha Jahon chempionatining yarim finalidan o‘rin olgan janglar 12-may, juma kuni bo‘lib o‘tmoqda. 

-54 kg vazn toifasida Oybek Jo‘rayev rossiyalik Dmitriy Dvaliga qarshi jang qilib, 5:0 hisobida g‘alaba qozondi va finalga yo‘l oldi.

Jo‘rayev yarim finalga qadar serbiyalik Tamir Galanov, albaniyalik Ariol Zeneli va ispaniyalik Gabriel Eskobarni mag‘lub etgandi. 

-67 kg vaznda Asadxo‘ja Mo‘ydinxo‘jayev Misheyelt Battumurga (Mo‘g‘uliston) hech qanday imkon qoldirmadi va final bosqichiga yo‘llanmani qo‘lga kiritdi. 

Asadxo‘ja turnir davomida yaponiyalik Yuto Vakita, belaruslik Kiril Samadurau va kubalik Roniel Iglesiasga qarshi jang qilib, g‘alaba qozongandi. 

-75 kg vazn toifasida A’loxon Abdullayev esa Braziliya vakili Vanderley Pereyraga qarshi ringga ko‘tarildi. Uch raund natijasiga ko‘ra, A’loxon raqibiga 1:4 hisobida imkoniyatni boy berib qo‘ydi. 

Abdullayev ushbu bosqichga qadar Mengyang Jao (Xitoy), Almir Memich (Serbiya) va Filip Akilov (Vengriya) ustidan zafar quchgandi. 

Bugun ringga ko‘tariladigan bokschilarning raqiblari va janglarning boshlanish vaqti bilan tanishing:

• -92 kg Lazizbek Mullajonov – Muslim Gajimagomedov (Rossiya), (17:00 dan so‘ng);
• -51 kg: Hasanboy Do‘stmatov – Martin Molina (Ispaniya), (18:15 dan so‘ng);
• -57 kg: Abdumalik Halokov – Munarbek Seitbek Uulu (Qirg‘iziston), (18:45 dan so‘ng);
• -63,5 kg: Ruslan Abdullayev – Xovanets Bachkov (Armaniston) (19:00 dan so‘ng);
• -71 kg: Saidjamshid Ja’farov – Vanderson De Oliveyra (Braziliya), (19:45 dan so‘ng);